Uurrisattora hasi`ratto coy kayinnilla dandoottokki rosichi noohe, hedotennino ikko loosunni iso sharrama fooliishsho ho`litinohe, uurrisa hasiroottohura calla uurrisa didandootto; seeda yannara sharramoottoha ikkirono qeelattora didandootto. Rosicho uurrisa shota labbinnoheha ikkiro sodhooti.
Rosicho uurrisa woy soorra lowo geeshsha ayirritanno yinanni loossa ledo gaamamanno. Lowo geeshsha ayirrannoha ikkino yaa kayinni didandiinanni yaa dikkitino. Garunni dandiinanni. Uurrisa hasirattoha busha rosicho uurrisa, agura dandaatto. Kayinnilla, mannootu bunshesi kultinohehura, batisse seejjitinohehura, baasa nabbawoottohura, baca egennoottohura, baca huwatoottohuranna gawajjosi e`inohehura calla kayinni disoorrattosi.
Mitto Coye soorra dandaattota ammanakki qara coyeeti; umikki aana gumulatto loosira umokki ammananna murciraancho ikka agarrannihe. Ee! Batinyu manni foonqeeti yinanni deerrinni uurrisa hasi`neemmo rosicho wirro qollanni hendeemmo; isi daafira baca yaandeemmo; hasi`nummo saatenni uurrisa dandiinoommokkihura huluullisannonke. Hiikku rosichino, rosichoho yaamamate seeda yanna adhinona uurrisatenna soorrateno umisi yannanna murciraanchimma hasi`ranno.
Sufamaanchonna taxxi yitannokki woyyaambeno wole hasiissanno coyeeti. Hasi`neemmokki woy uurrinsammora hasi`neemmo rosichi ledo araara kalaqa, rosaminoha assa; sumuu yaa; rosichonke ikkinota adha qole bunshete rosicho soorrinanni qara doogooti.
Araaramisi! Hasi`rattokki rosichi ledo sumuu yii; keere kalaqi, haaru coy gede assite adhitooti; alba ikkannohu gede ikkona fajjisi; wolassisi. Soorrate hedokki kayinni deantooti; rosichikki kayinni bashshohu gede sufona agurisi; kissootisi; illacha uytootisi; aye woyteno isi daafira hedakki uurrisi.
Korkaatuno, wirro qoltanni hedoottohura roorenkanni qa`mire giwannohe ikkinnina atewiinni baxxannonna agururannohe rosichi nookkihura. Gara ikkitinokki hedo ledo heewo kalaqqe qeelattora didandaatto; hasi’rattokki gumulo daafira heddanni soorrattora didandaatto; albihunni aleenni yannanna illacha uytannisi baxxattora didandaatto.
Ee! Araaramisi; dandiitto bikkinni shota gede assite la’’ate wo`naali. Illacha uytootinsa. Insa baycho horo uytannohe rosichubba rosiisiri; illachakki insa aana assi; coye danchummatenni adhitannonna ajuuja noonsa mannooti ledo hosa hanafi; surrekkira itisatto coye qorophi.
Hasi’roottosikkihura calla gawajjinoheha busha rosicho mitte higge fushshite hunate wo`naaltooti; suutunni gogisiisse baychunni kaysi. Tonne higge heddannisi “Aguraera didandiino” yitooti. Aguroottokkihu ateeti ikkinnina iso ikkinokkita huwati. Hasi`ratto rosicho baxillunni dhaabbanni hasi`rattokkitano gogisiise geegiissa afi. Dancha yanna ikkonke!!
Bue:- @Meentaalkawunsil
Abbebech Maatewoos
Bakkalcho Woxawaajje 12, 2014 M.D
