Diredaawa:– Itophiyu Shoole dirra giddo haanju harumi mixonni 25 Biliyoone ali kaashsho kaasase dancha guma ikkinota IFDR XM Dr Abiy Ahimedi xawisi. Kaasamino kaashshi diilallote gade soorro dandaatenna giwirinnu laalchimma lossate widoonni soorro abbanni daynotano qummeessino.
Xaphoomu ministirchi Dr Abiy; Dirre Daawu quchumira harinsoonni shoolki haanju harumi mixo xaphi assate qixxaawo aana xawisino garinni; Itophiyaho sa’u shoole dirra giddo haanju harumi mixonni hendoonni guma afi’nanni hee’noonni.
Haanju harumi gumi dubbu jiro lossatenni aleenni laalchimma lexxitanno gede assinota kayse; sagalete wowe garunni buuxisate gummate laalo aana illachisha hasiissannonke yiino.
‘’Latishshu loosinkenni uurrisannonkeri mitturi dino’’ yiinohu Xaphoomu ministirchi; Itophiyu Jireenya buuxisate wo’munku handaari sharro assinanni hee’noommo; gumulsineemmono’’ yiino.
Aantetenni haanju harumi mixo dikkote shiqanno kaashshinna isilanchimmate aana illachinshe Qamade calla ikkikkinni Woyinenna shaete daro labbino laalcho laashshatenni gobbaydi dikkora halashshine shiqisha dandiineemmo yaanni xawisino.
Shiima Miliyoonenni kaashsho kaasa qeellete gede kiirtanno kalqe aana shoolu hawadinni 25 Biliyoone haqqu mu’ro kaasatenni gumula dandiinannita leellinshoommo yiino.
Xaphoomu ministirchi xawishshi garinni; haanja haruma hanafa Itophiyaho lame qara qeelle kalaqqino. Umihunni lowohunni hende halammummoro lowohunni gumula dandiineemmota naqaashe ikkinonke; laynkihunni Jireenyaho kaima ikkanno bude kalanqoommo.
Kaashsho kaasate budi gale hosanna sagaletenni umonke dandiineemmo gede, kofattuwanke sufo noo xeena afidhanno gedenna shaqqadu bushshinke hoshooshamannokki gede assannota xawisino.
Gibrinnu ministirchi kalaa Umer Huseeni isi widoonni; shoole dirra giddo haanju harumi mixonni 20 Biliyoone kaashsho kaasate hende 25 Biliyoone kaashsho kaasa dandiinoonni yiino. Konni loosinnino 25 miliyoone ali qansooti beeqqaano ikkitinota xawinsoonni.
Shoolki haanju harumi mixonnino xaa geeshsha 7.8 Biliyoone kaashsho kaansoonni. Tinino dagate beeqqo afisiissino jawiidi gumulooti yiino.
Xaa yannara kaasaminohu 500 Miliyoone kaashshi hee’rasi qummi assinohu Dr Abiy; xeenu hanafanno qooxeessubbara kaansannita egensiisino. Aanteteno chiginye kaasate budi rosame wo’munku woyti looso ikkanno gede loonsanni yiino.
Qiddist Gezaheny
Bakkalcho Woxawaajje 12, 2014 M.D
