Hawaasa: Qoqqowoho 2014 baajeettete dirinni mixote aleenni eo gamba assa dandiinoonnita Sidaamu Qoqqowi Eote Biilloonyi Egensiisi.
Sidaamu Dagoomu Qoqqowi Mootimma Eote Biilloonyi Qaru Dayrekterichi Kalaa Haylu Gudurihu Itophiyu Pireesete Uurrinshara xawisino garinni; qoqqowu deerrinni 2014 baajeettete diro 5.5 Biliyoone Birra eo gamba assate mixi’ne 5,992,585,704.00 Birra eo gamba assa dandiinoonni; kunino mixotenni xibbuunni 109% ikkinota qummi assino.
Sai 2013 baajeettete diri gumulshi ledo heewisiinsanni woyte 2014 baajeettete diri gumulshi ledo heewinsanni woyte luphiima lexxo leeltanno gede coyi’rannohu Kalaa Haylu; addi addi loosu hayyo kalaqatenni, moora gargaratenninna tekinoolooje horonsi’ratenni
hattono loosaasinete ikkadimma ledatenni waaxamme loonsoonni loosinni woyyaawino gumi daara dandiinota xawisino.
Giwire gamba assa hedotenna angate co’ichimma hasidhannota kulinohu kalaa Haylu; hedote co’ichimma noonsari eote biilloonyi loosaasine noontenni gede kiironsano batidhannokkiri eote hafanfarrera angansa noo handaaru loosaasine noo gede uurrinshanke ledo assino hasaawinni xawisino.
Amadisiiseno, qaru dayrekterich; yanna yannantenni assinanni qorqortonni daddalaanote ledo hasiisannokki xaadooshshe assatenni mootimmate eo hafanfarsitannori handaaru loosaasine noo gede afate dandiinoommo. Kurira qaafo adha hananfoommo; togoo ikkitubbanni qorowantannokki loosaasine aantetennino lallawunni uynoonninke biilloonyi garinni qorichinsheemmo yiino.
Qoqqowoho 2015M.D giwiru dirinnino 10.9 biliyoone birra eo gamba assate mixi’noonnita kulinohu Kalaa Haylu; tenne seyoora iillate giwirensa maaxxukkinninna yannatenni baattu daddalaanora, loosaasinetenna halamaano bissa baalate galata shiqishe; xa hee’noommo baajeettete dirirano konni garinni sunfummoro konninnino roore gumaamma ikka dandiineemmo yiino.
Addisu Adoola
Bakkalcho Woxawaajje 12, 2014 M.D
