Addis Ababa:- ‘’Itophiyunni sae Sudaanetenna Gibtsete dagara horo uytannota Abbayi kofatto Itophiyu hawallella gatamarinke yitanni Gibtsenna Sudaane coyidhanno barri xeerto dikkino’’ yiino Atleet Kumu Roorrichi Hayile G/Sillaase.
Abbayi kofatto laynki Terbayine looso hanafisiisanna Sayikki doycho way wo’ma garunni gumulama lainohunni Atleet Kumu Roorrichi Hayile G/ Sillaasehu baxxinohunni Itophiyu Pireesete Uurrinshara xawisanni; suwashshimmate xawishshanna Adiwu qeelle gede Itophiyu miinju wolaphonni Afrikunni lawishsha ikkitino bayiriidi Haaroo’mate kofatto wo’mante Itophiyu daga sharronni konne deerra illase Itophiyu qeelaanchimma gotti assite kalqete leellishshinote yiino.
Atileetiksetenni, latishshu loossanninna adawu handaarinni Itophiyu borreessiissanni noo qeelle konni albaanni assine egenninoonnikkitanna ninke Itophiyu daga addintanni dandiineemmota leellinshoommota leellishshanno yiinohu Atileet Hayile G/Sillaase; tenne baala qeellenkenni Kaaliiqi kaa’linonke yee ammaneemmo; konnirano lowo galati hasiisanno yaanni xawisino.
Bayiriidi Haaroo’mate kofattonni kaa’lamanna halama mageeshsha qeellete iillishshannotanna mittu massagaanchi hanafinoha wolu sufisiisatenni Itophiyu hobbaate buuxisa dandiinannita garunni la’noommo yiino.
Itophiyu marfe nafa loosa didanditanno yinanni umonke xonnanni keeshshinoommo yiinohu Atileet Hayile; ikkollana, kuni Itophiyanna Itophiyu daga xawisannokkitanna Itophiyu daga mittimmatenni loonsummoro dhagge loosa dandiineemmota tenne lamala giddo afi’noommo qeellenni leellinshoommo yiino.
Atleet Hayile xaphi asse sokka sayisanni; Itophiyu daga anfannino ikko anfummokkinni diinu illachinna hunote soqqamaano ikkineemmokki gede qoropha hasiissannonke.
Dandiinummoro Itophiyu keeriranna lophora uminke hedo Sumuda wora togo assa dandiinokkihu ajanni ajeenna latishshu harinsho guficho ikka hoogatenni dhaggete xa’mamaanchimmanni umosi agadha hasiissanno yiino
Qiddist Gezaheny
Bakkalcho Woxawaajje 12, 2014 M.D
