Mitte meyaati lowo geeshsha baxxannohu mini saada gede assite losidhannohu mittu hamashshu noosenkanni. Seendillisi lame meetirenna boco ikkanno.
Muli barrubbanni hanafe kayinni hamashshu sagale saga`la agurinohura saga`lanno assate baca wo`naalsha assiturono heddino gede ikka hooginohura yaadde saadate xagisaanowa haadhe hadhanno.
Hakkiinnino saadate xagisaanchi boode xa`mubba xa`ma hanafi. Muli yanna kawa hamashshu hittoonniiti goxannohu? Manchono qoltu “Mitto barra goxoommawiinni baqqi yuumma woyte qote`ya wo`muy wo`ma diriire goxinoha afumma. Wole barra qole ane aanaanni wo`muy wo`ma diriire goxinohaati la“oommahu. Tenne wole barrano qole umosi lekkaalloo`ya, farriiddosi kayinni umiidi`ya widoonni wodhe fitire goxe nooha afummasi; ikkitosi e`inoekkihura konne coye huwata didandoomma yitusi.”
Xagisaanchuno lowo geeshsha maala`lihu gedensaanni ise qarru aana nootanna konne hamashsho saada ce`nanni mereershira uytanno gede amaalise. Hamashshu saga`la agurinohu godowasi mulla assatenna godowisi giddo hala`ladu bayichi hee`rannosi gede assateeti.
Qotekki babbaxxino ragubbanni goxinoha afattahuno ate hiitto asse egemmannohero bikkakki bikkanni noo yiise.
Duuchunku baxilli baxille dikkino. Duuchunku jaalloomi jaalloomma dikkitino. Badooshshesi wodanchino. Baarigaaru baxillaancho lawe shiqankera dandaanno. Heeshshi yaatenni shooshanqesi leellishankera dandaanno. Kayinni qorophotenni buunxo.
Korkaatuno baxillaanchonke lawe laafa midaadonke xiinxallanni woy hiitto asse hunankera dandaannoro baxillu su`minni bale umankera dandaannona. Shiqanno `ne mancho buuxidhe.
Bakkalcho Woxawaajje 5, 2014 M.D
