Chaynu giddo dureessa ikkinohu “Jak Ma” yinanni mancho ikkanna 39 biliyoone doolaare hendanni jiro noosi. Jak Ma togo yaanno “Woxenna muuze galadu albaanni worittoro galadu muuze doodhanno. Korkaatuno woxu bae muuze hirannota diaffino!
Batinyu manni aana mittu dani xiinxallo assitinironna mittu hallanyu loosi woy biizinesenna aganu damoozi mereerinni doorshinsa maa ikkinoro xa`mitiniro haammatu manni aganu damoozi noosi looso doodhanno. Korkaatuno shiimano ikkiro hallanyu loosi woy biizinese aganu damoozinni roorino e“o abbannotanna heeshsho soorrannohu iso ikkinota affinokkihuraati.
Manna buximate aana tugganno coyibbanni mittu hallanyu loosinni woy biizinesenni dagganno kaayyubba la“a hoogankeeti. Korkaatuno heeshshonsa dirinni baala rosu minnara rossannohu loosu yaa aye woyteno aganu damoozira loosa ikkinotaati. Uminsara loosatenni roore wolootaho loosa callicho doorsha ikkinota rossino! Addaho aganu damoozi buximatenni agarannohe. Ikkolla ikkinnina jiro afi`rattokki gede assannohe.
“Heeshsho`yanni soodihunni 2 saatenni kayse 12 saate geeshsha loosannoha qaxaramaancho mancho dureessa afe diegennoommo” yaanno Jaak Ma. Addaho xaa yannara ninke gobbarano noo halaali konneenti. Korkaatuno qaxarante afirattohunni aganu damoozinni jiro, wodho, minenna umokki soorrite wole manna kaa`la didandaatto. Halaaleho aganu damoozi hee`rihero hasirattore assa hoogittorono e“okki bikkinni hee`ra rosatto. Looso hasidhinanni yanna`ne huntinankunni shiimunnino ikkiro umi`ne looso hanaffinanni loosu kalaqo hedo aana illacha assa hasiissanno.
Abbebech Maatewoos
Bakkalcho Woxawaajje 5, 2014 M.D
