Amsaalu Felleqe
Lakko:- Amandoonnihu 2014M.D eote dirinni quchumaho 37.1 miliyoone birra eo gamba assate mixi’re 36 miliyoone 943 kumenna 900 birra eo gamba assa dandiinota Lakkote quchumi eote sinu borro mini egensiisi. Kunino mixotenni xibbuunni 99.5% gumulloonnita xawinsoonni.
Lakkote quchumi Eote biilloonyi sinu borro mini sooreessi kalaa Birru Made xawishshi garinni; xaa yannarano deerra ‘C’ giwire gamba assinoonni. Quchumaho 998 daddalaano deerra ‘C’ giwire baattanno yine herreeggo loonsoonniha ikkanna xaa yannara daddalu loosi luphi yaanni noohu ledo amadisiisame deerra ‘C’ daddalaanowiinni mittu agani giddo
giwire gamba assate hende harancho yanna giddo xaphoomunni 1028 giwiru baataanowiinni 4.7 miliyoone birra eo mucci assine gamba assa dandiinoonnita kule; kunino mixotenni xibbuunni 103% gumulloonnita xawisino. Handaarunni kalaqamanno koffeenya tirateno lamu gari komite uurrinseenna shiqino koffeenya buunxe tira dandiinoonni daafira eote ragaanni moorunna awaawurshu ajanni haranno gede kaa’lino yiino.
Eote handaari konni albaanni mooraho reqecci yee keeshshinota kulinohu kalaa Birru; sa’u yannara labbanno bainchu assootubbanni angansa noore harunsine qorichishantanno gede assa dandiinoonni kaiminninna giwiru herreeggo ledo amadisiisaminohunni kalanqoonni xawadimmanni xaa yannara daddalaanotewiinni ka’’anno koffeenya ajisha dandiinoonnita huwachishino.
Herreeggote ledo amadisiisaminohunni kalaqantino mommodda wirro la’’atenni taashshinannitano amadisiisatenni. Gattino yanna giddo deerra ‘B’ na ‘A’ giwire yinoonni yanna giddo awaawuru nookkiha ammanamatenni baattanno gede assateno kakkayishshu loossa loonsoonnita qaagiissino.
Quchumu eo yanna yannantenni lexxitanni dagginota qummeessinohu sooreessu; 2015M.D xa noowiinni luphi assine 55 miliyoone 774 kume, 918 birra eo gamba assate mixo amandoonnita egensiisino.
Giwire baantannihu gobbate keeri hee’rirooti yiinohu sooreessu; giwire ammanamatenni baata qooxeessaho babbaxxino latishsha halashshatenna gobbate latishshiranna ga’labbono agarsiisate ikkinota huwatatenni baataano yannatenni baattanno gede amadisiise sokkasi saysino.
Bakkalcho Maaja 14, 2014
