Abrahaam Saamueel
Addis Ababa:- Eote Ministeere jeefisamanni noo tayxe 2014 diro 336 biliyoone birra ale eo gamba assitinota Eote Ministeere Ministirchi Kalaa Laaqe Ayyaalew egensiisino.
Itophiyu 2022 gobbomu taksete gashshoote ijaarre gobbate fulo meessi eonni dandaate assinanni wo`naalsha qinaawinoha assate sokko uynoonniti Eote Ministeere qinawiino garinni eo gamba assate dhuka kaajjishe suffino yiino.
Konne leellishannohu Ministeere tayxe baaajeettete diro gamba assate mixidhino 360 biliyoone birri giddo 336 biliyoone 710 miliyone 21 kume 930 (336, 710, 021,710) birra gamba assatenni mixi`noonni mixoo xibunni 93.53% gumula dandinoonni yiino.
Gumulono sai baajeettete diri ledo keenniro 57 biliyoone 494 miliyone 923 kume 697 birra xibbunni 20.59% anga lophitinota Kalaa Laaqe Ayyaalwu coy`rino.
Gamba assinoonni eote bue gobbate taaksenni 196 biliyoone, 211 miliyone 638 kume 548 birra ikkanna, gobbaydi daddalinni qaraxunna taaksetenni 140 biliyoone, 498 miliyone, 338 kume 382 birra ikkinota lede xawisino.
Eo gobbankera kalaqamino olinni haammata uurrinsha loosu gobbaanni higgino yannara, olu korkaatinni dadallu qiidino woyte, babbaxino qooxeessira kalaqantino gaancenni uurrinshubba garunni looso loosate qarrantino yannara hattono daddalaano daga loosonsa ge`e loossinokki yanna giddo kageeshshi eo gamba aassa dandaa woyyaabbino gumulooti yaa dandiinanni yiino.
Seerimalu daddalinna kontirobaande hattono kaphu dikko eo gamba assate jawa jifo ikkiturono, konne sa”ate Eote Ministeere dagatenna hajo la`annonsa bissa ledo halamme loonsanni loosi kaajje sufirono, serrimalu loosi wo`unni wo`ma bainokki yannara tenne labbino eo gamba assa uurrinsha jawaatte loossinota leellishanno yiino Ministerchu.
Bakkalcho Maaja 14, 2014
