Shabbadiino:- Woradaho tayxehu haanju haruminni 8 miliyoone ale haqqu sircho kaashshoho qixxeessinoonnita woradu Irshunna kalaqamu jiro latishshi borro mini egensiisi.
Borrote mini sooreessi kalaa Alemaayyo Ledamo baxxinohunni Itophiyu pireesete uurrinshara xawisino garinni; 2014M.D 4ki doycho haanju harumira kaashshoho 6 miliyoonenna 100 haqqu sircho qixxeessate hende 8.1 miliyoone qixxeessinoonni.
Xaphoomunni qixxeessinoonnihu haqqu sirchi giddonni 3 miliyoone 790 kumi addi addi laalote sircho ikkinota xawisinohu sooreessu; kunino sagalimmate horora ikkitannota haqqu sircho kaasatenni sagaletenni umo dandaate assinanni hee’noonni wo’naalshira kaa’litannore ikkansa coyi’rino.
Kaansanni hee’noonniri haqqu sirchi diilallote akati soorro woyyeessatenna bushshu hoshooshamme gatisatennino sae sagalimmate horora hossanno garinni kaanse latisate illachinshoonnitano sooreessu qummeessino.
Woradaho sa’u sase dirrara haanju harumi loossanni xaphoomunni 11 miliyoone haqqu sircho kaansoonniha ikkanna tayxeta lendanni woyte 4 diri giddo 19 miliyoone ikkannotano kalaa Alemaayyo coyi’rino.
Haqqu sircho yanna agarre kaasa calla ikkikkinni kaansoonnita garunni awuutanna qooxeessa saadatenna mannunni doogimale kikkisamannokki gede assine latisate injo kalanqoonnitano hattonni.
Woradaho mootimmate deerrinni laalote gumma sircho hala’ladunni qixxeessinoonniha ikkanna; woradunni sae wolootta qoqqowubbara sonkannitanna loosidhe galtinorino uminsanni qixxeessidhanni kaasidhanno gede assinanni hee’noonnitano lede xawisino.
Shabbadiini woradi qaru gashshaanchi kalaa Agana Neto isi widoonni; haqqe kaasa ilamate injiitino kalqe tareessate yiinohu;kaaliiqi uyno baattoragunni hoongummoro diilallote soorro hudetenna moollete reqecci assitanno daafira baattote xagichi haqqe kaasa ikkinota duuchunku huwata hasiissanno yiino.
Shabbadiini woradi haqqete kaashsho halashshate injiino diilallote akati nooha ikkasinni woradunni sae qooxeessaho afantanno daga chigginye laashshine iillishatenni qaddo ikkasino qummeessino.
Wole widoonni dubbu kaashsho calla ikkikkinni sagaletenni umonke dandiineemmo gede kaa’litanno laalo aana illacha tuga hasiissannota qummeessinohu kalaa Agani; qooxeessa qooxeessanko gatu jajja mooshshate dhuki noo haqqu sircho baardaafe lawinore jajjunni xeertinse kaasa hasiissannotano buuxisino.
Bakkalcho Maaja 14, 2014
