Amsaalu Felleqe
Addis Ababa:- Sidaamu qoqqowira tayxehu hawadi yanna wedellu dancha fajjo owaantenni 1.2 biliyoone birra mootimmate fulo gatisate hende loonsanni hee’noonnita Qoqqowu Meentu, Qaaqquullunna Wedellu Hajubba Biiro egensiissu.
Qoqqowoho 2014M.D hawadi yanna wedellu dancha fajjo owaante ‘’Danchumma Itophiyahonna qoqqowinke lophora’’ yaanno massagote qaalinni tenne lamalara Alatta Wondi quchumira qoqqowu pirezidaantichi kalaa Desta Ledamo faajjetenni hananfisiisino.
Sidaamu dagoomu qoqqowi pirezidaantichi kalaa Desta Ledamo tenne yannara coyi’ranni; wedellu hawadi yanna dancha fajjo owaantenni haanja harumansa woratenni, dagoomaho fayyimmate, rosu handaarranni huwanyoote kalaqatenni hattono quchummanna qooxeessuwa biifisatenninna mundee aatenni hawadi yannansa sayissanno gede qummeessino.
Wedellu dagoomaho assitanno kaa’lonna uytanno owaantera qoqqowu mootimmano wedellu ledo halante loossannotano amadisiise xawisino. Sidaamu Dagoomu Qoqqowi Mootimma Meentu, Wedellunna Dagoomittete Hajo biiro layinki sooreessinna Wedellu
Handaari sooreessi kalaa Desta Leggese isi widoonni; qoqqowoho tayxe hawadi yanna wedellu dancha fajjo owaantera xaphoomunni 567 kumi ali wedelli beeqqaano ikkatenni dagoomaho owaante uytanno yiino.
Wedellu egennonsa, ogimmansanna dhukansa horonsidhe dagoomaho dancha owaante aate rosichi bude ikkanni daynota xawisinohu sooreessu; 2014M.D hawadi yannarano qoqqowoho quchummatenna baalante woraddara 4 miliyoone haqqu sircho wedellu dancha fajjonni kaansanniha ikkanna; woloottano babbaxxitino owaante dagoomaho uytannota xawisino.
Tayxehu hawadi yannara wedellu dancha fajjonsanni uytanno owaantennino xaphoomunni 1.7 miliyoone daga horaameeyye ikkitanno yiinohu kalaa Desta Leggesehu; tenne owantennino 1.2 biliyoone birra mootimmatenni fulo ikkara dandaannoha gatisate mixi’noonnita lede egensiisino.
Bakkalcho Maaja 14, 2014
