Abrahaam Saamueel
Addis Ababa:- Giwirinnu ministerera loosu aana hosiinsoonniti laalchonna laalchimma haaroonsate assinoonni sharro gumu lexxanno gede jawa qeecha fultinota Giwirinnu Ministeere egensiissino. Ministeerchu gobbate giddo horora hasiissannoha 1 bileene doolaare qamade hirate fushshinanni woxu soorro gatisa dandiinoonnita xawisino.
Giwirinnu Ministeere Ministerchi Kalaa Umeri Huseenihu IPura xawisinonte gede, giwirinnu sekterera assinoonni haaroonsate loosi soorrote albaanni noo qarrubba badatenni assinoonni haaroonsanni laalchunna laalchimma lexxitanno gede jawa qeecha fulino. Leellino guminni gobbate giddo hoshshora hosanno qamadete laalchi hasatto wonshine daanno diro gobbara soyaate dandiisiisanno dhuki noota xawisino.
Soorrote albaanni 27 diro loosu aana hosiinsoonnikki giwirinnu massagote miinji hattono goyrete giwirinni aana calla irkire noohu giwirinnu laalchinna laalchimma laxxitanokki gede asse keeshshinota kulinohu Giwirinnu Ministerchi Umeri, saiha sase diro loosu aana hosiinsoonni haaroonsate loosinni sekiterete hexxo aanno gumi borreessamino yiino.
Ministerchu xawishshi garinni, laalchonna laalchimma lossate dandiisiissanno goyrete giwirinni aana calla xintaminoha soorratenni arri gorsu loosi aana illacha tunge loonsanni hee`noonni. Konninino, arri gorsi loosinninna goyrete giwirinnu qamade laashshine gobbate giddo hajora qamadete laalchi hasatto wonsha dandiinoonni. Xa afi`noonni sewoo kaima assine daanno diro qamadete laalcho gobbara soyaate dandiisiisanno dhuka kalanqe loonsanni hee`noonni.
Konni lede, sektere baalunku handaarinni laalchonna laalchimma lossate, giwirinnu handaara yanneessate looso loonsoonni. Xaa geeshsha loonsoonni loosinni 550 ale ikkannoha yannicha irshu uduunne qaraxiweello hirre gobbate giddora eanno gede assinoonni.
Waagu lexxo widoonni amadame madaabaru waagi lexxo gargarate baatto loosidhe galtanno dagara xibbunni 25 anga irko assinoonnita qaagiisse, madaabaranna tekinoolooje horoonsi`nanni widonni noo qarra hunate konni handaarinni xiinxallo assitanno bissa ledo halamme loosatenni jawu gumi borreessamano yiino.
Qooxeessu agarooshi widoonni, atikiltenna firaafirete kayishsho sagalete umo dandaate haanju harumi ledo xaadinse haammata looso loonsanni hee`noonnita Ministerchu qummeessino.
Haanju harumi diilallote gadi soorro gargaratenni jawa qeecha fulannota xawisinohu Ministerchu, konne dayee nooha hawado dagankeno ofolla agurteenna jawaante lonsummoro kaarbenete dikkora sa”ate hala`lado kaayyo noota xawisino.
Ministerchu, ga`labbote qarri noo baycho baala giwirinnu loosi edderamannokki gede assate ga`labbote bissa ledo loonsanni hee`noonnita xawise, xaa geeshsha loonsoonni loosinni ga`labbote qarri noo qooxeessi giwirinnu loosira higginotanna giwirinnaho hasiissanno uduunnichi, dooramino sirchinna madaabaru iillanni noota buuxisino.
Bakkalcho Maaja 14, 2014
