Abrahaam Saamueel
Addis Ababa:- Gobba soorrote doogo aana hadhanno gede assatenninna daganke qarru giddonni fushshate mimmito dandaamanna macciishama hasiissannota IFDR Pirezidaantitte SahilWorqe Zawude egensiissino.
IFDR Pirezidaantitte SahileWorq Zawude tenne lamalara Addis Ababu Yuniversite rosaanote maasso battalara afante xawissino garinni; maassantini rosaano dagoomu, rosunna polotiku jifo sa`ine Yuniversite e`ini yannara mixidhinoonni looso`ne seynoha assa dandiitinoonni daafira hawalle tashshi yiino`ne yitino.
Gobbanke latishshu, danchu gashshooti, dimokiraasete, farcotenna keeru doogo aana hadhanno gede assa baalunkuwiinni agarranni; egennote buqqeenni bowirino wedellichi qeechi erote yitino.
Gobba soorrote doogo aana hadhanno gede assatenna daganke qarru giddonni fushshate mimmitu ledo dandaama, macciishshamanna hasaawa hasiisannonke yitinoti Pirezidaantitte; rosino manchi gobbasi qarra hiitto asse tirannoro xiinxallanno; qarru aana noo fiixisi qarra huwatanno.
Rosaano, rossinoonni rosi daninni loosu widira e`inanni yannara loosu aana hosiissine maate, fiixi`neranna gobbate owaante uytinannire ikka noo`ne yite xawisse; rosa yaa huwanyo lossanna seedinse la”ate; qarru yannara qaccete uurrine la”a ikkikkinni, ikka noosikki coy kalaqamanno woyte kuni coy dikkanno yitinannire ikka noo`ne yitino.
Itophiyu haammatu qarri aana noota ikkitanna, egennotenna dandootenni gatamaramino wedelli hasiissannose yitinoti Pirezidaantitte SahileWorqi; baxxinohunni saiha lame diro gumulamino coy horontanni kalaqama noosikkirichooti.
Buxicho daga noowinni buximatenni fushshatenna gobba gatisate sharrama dandiinanni hee`ne, haammatu manni mundee du`nantinoti wodana kissanno. Haammata gobbuwa gobbansanni fulte kalqete hedo amadde hadhanni noo yannara ninke amma`note, afuunni, gosatenni hattono wolootu coyinni babbadammenna qansootinke yanna yannatenni gorrantanni nooti lowo gede yaadisannota coydhino.
Rosa yaa la`nanni hee`ne dila`noommo yaa dikkitino; sammi yine saysa dikkitino yitinoti Pirezidaantitte; maassamaano noowa heedhe gobbate mittimmaranna lophora loossanno gede woshshatto assitino. Mootimmano maassamaanote loosu kaayyo kalaqate jawaatte loossannota xawissino.
Addis Ababu Yuniversite Pirezidaantichi Piroofeeseri Xaasewu Woldehaanna isi widoonni; Itophiyaho giddoydinna gobbaydi diini haammate noo yannara maasantinoonni daafira, sirchunna gosatenni babbadamatenni fultine gobba`ne xiinxallotenna buuxotenni kaa`la hasiissanno`ne yiino.
Addis Ababu Yuniversite 73ki yannara addi addi rosi golinni rosiissino rosaano 5 kume 58 rosaano tenne lamalara maassiissino. Rosaanote mereerinni 2 kumi 420 umi digirenni, hattono 2 kumi 438 laynki digirenni rosonsa harunsitinoreeti. 131 ikkitannori kayinni sayikki digirenni maassantinore ikkitanna; 239 kayinni isipeeshaalitete ikkinota anfoonni.
Amadisiisantino odoonni; gobbanke xaadinose haammatu qarrinni fushshate baalunkura qeechu heerirono, rosiisaanotenna rosiisaanote uurrinsha qeechi erote yaanni Rosu Ministere Ministirchi Pirofeeseri Birhaanu Naggihu coy`rino.
Rosu ministirchi tenne coyi’rinohu Kotebe Rosu Yuniversite 2014M.D digiretenninna laynki digirenni babbaxxino rosu daninni qajeeltinore 2,891 rosaano tene lamalara maassiissu yannaraati.
Maassote amuraati aana battalate leellinohu Rosu Ministere Ministerchinna barru wosinchi Pirofeeseri Birhaanu Naggihu saysino sokkanni, gobbanke xaadinose haammatu qarrinni fushshate baalunku qeechanke fullo yee; ikkollana, qarrinkenni albillicho gatate baalunku coyinni rosiisaanonna rosiisaanote qajeelshu uurrinsha qeechi erote. Konni garinni, ikkadda ikkitino rosiisaano qajeelsa mootimmate qara looso ikkannota coyi’rino
Bakkalcho Maaja 14, 2014
