Addis Ababa:- Cancishaanchu Shene gaamo keeraano qansoota raafatunni shaatenni daganna mootimmate mereero babbadamooshsha kalaqate assitanno wo’naalshi tolannokkitanna kaajjado qaafo adhinanni hee’noonnita Galchimi Wollaggi zoone gashshooti egensiisi.
Cancishaanchu Shene Galchimi Wollaginna Qellem Wollaggi zoonnara afantanno olluubbara sa’u muli barru giddo keeraano qansoota raafatunni shee gudinoti qaangannite.
Cancishaano gaamo iillishshino ganonni haammata keeraano qansooti lubbonsa hoogginoha ikkanna bisunna tiiu aanano gawajjo iillishshino; jajjinsano lowonta gawajjamino.
Galchimi Wollaggi zoone qaru gashshaanchi kalaa Selemoon Taammiru xawisanni; cancishaanchu Shene gaamo gobboomitte soorronni kalaqaminoha keeraatunni assinannita poletiku sharro qacce qole aguratenni Galchimi Oromiyi qooxeessira dubbo e’e shittite keeraano qansooti aana yanna yannantenni gawajjo iillishshanni keeshshitino.
Gaamo keeraano qansoota barshetenni shitinoha ikkanna jajju aanano lowo gawajjo iillishshinota kulinohu qaru gashshaanchi; dagoomaho owaante uytannota babbaxxitino uurrinshuwano giiratenni horote gobbaanni assitino yiino.
Hunaano gaamo sa’u dirrara Oromote daga su’minni sharrammeemmo yitanni ga’a gobba ragidhanno rosaano gattukkinni raafatunni shaatenni kakkachimmansanna gobba diigate hasattonsa leellishshino yiino.
Ilama egennotenninna danchu amanyootinni bilchaatte lophitanno gede qunxanniwa rosu minna lede haammata dagoomitte uurrinshuwa giiratenni badhera higgannokkiri hunote gaamo haammata loosidhe galtinori minnanna ataachidhino gidensano giirte gawajjitinota coyi’rino.
Cancishaachu Shene gaamo Galchimi Wollaggi zoonera shittite millissanno qooxeessuwara poletiku illachinsara yitanni Oromote, Amaaru, Gumuzete daga raafatunni doddolte shaatenni daga mootimmate aana ammano heedhannonsakki gede assate wo’naaltinota xawisino.
Keeraano qansoota raafatunni shaatenni daganna mootimma babbadatenna sirchunni gaance kalaqate assitanno wo’naalshi hiittenne yannarano tolannonsakkita huwachishinohu gashshaanchu; cancishaano gaamo aana kaajjado qaafo adhinanni hee’noonnitano coyi’rino.
Gawajjantino qansootira mannihimmate irko shiqinshanni hee’noonniha ikkanna kuni assootino kaajje sufannotanna qansootu hobbaate sufino garinni buuxisiisate loonsanni hee’noonnitano amadisiise xawisino.
Amsaalu Felleqe
Bakkalcho Maaja 7, , 2014 M.D
