Addis Ababa:- Sidaamu baanke xaa yannara Biheeraawe baankenni wo’ma fajjo afidhe Awuroppu kiiro garinni Maaja 1/2022 hanaffe loosu giddora e’anno gede fajjo uynoonnita baankete pirezidaantichi kalaa Taaddese Haxxiyyi egensiisi.
Daddalu ministerennino fajjo afi’noonnita baxxinohunni Itophiyu pireesete uurrinshara kulinohu baankete pirezidaantichi; aantino harinsho hasiissannota babbaxxitino tajubba garunni maareekkine looso faajjetenni hanafate balaxote loossa giddora ea ikkinotano amadisiise xawisino.
Xaa yannarano balaxote qixxaawo looso lainohunni “Core Banking” yaamamannoha hidhatenni; fannanni sinnara hasiisannore hirre wonshini gedensaannino Biheeraawe baanke wirro buuxxe kaajjishshu gedensaanni loosu giddora e’nannita xawisino.
Sa’u 20 dirra ale ikkitanno yannara Mayikiro fayinansete uurrinsha ikkite owaante uytanni keeshshite baankete deerrira lophitinoha ikkasinni konni gedensaanni gobboomu qeechase fultanno uurrinsha ikkatenni qooxeessu dagoomira luphiima liqoote kaayyo aatenni miinju yawose fultannotano amadisiise kulino.
Sidaamu baanke kaimu kaapitaaleno 1.45 biliyoone borreessantino kaapitaale ikkasenna konni giddonnino loosu aana hosinohu woy baantoonnihu 574 miliyoone ale birra ikkinotano pirezidaantichu kalaa Taaddese coyi’rino.
Balaxote qixxaawo gundeenna jeefote fajjo uynanninsa baankuwanni mitte ikkitannoti Sidaamu baanke kaimu kaapitaale 500 miliyoone birri noowinni 5 biliyoone ikkanno gede assinoonnita qummeessino.
Baanke duuchunkura owaante uytannota ikkasenni qooxeessu dagoomi gobbaannino gutu miilla ikkitino mannooti, uurrinshuwa, maamarra, amma’note uurrinshuwa gobbydinnino ikko gobbate giddo noori gutantinore ikkansa kule; ‘’Sidaamu Baanke Duuchunku Baankeeti’’ yaannoha massagote qaalinni duuchanka owaantanni baanke ikkase leellinshanni yiino.
Baanke faajjetenni loosu giddora e’anno gedenna loosoho kaapitaalete anje xaaddannokki gede gutu miillanni malaatinsoonniti gattino kaapitaale yinoonni yanna giddo mucci assite baattara agarranni yee; muli yanna giddono Itophiyu Biheeraawe baanke fajjitanno garinni ledote gutu sheere hirrannihura duuchunku tenne kaayyonni horaameeyye ikkitanno gede pirezidaantichu amadisiise sokkasi saysino.
Amsaalu Felleqe
Bakkalcho Maaja 7, , 2014 M.D
