Addis Abeba:- Qansootu aana ledote ganonna goofo iillitannokki gede baalante qooxeessubbara reqeccaabbino olluubba bande hasiisanno agarooshshe assinanni yino layinkihu xaphoomu ministirchinna gobbayidi hajo ministirchi kalaa Demmeqe Mekonninihu.
Kalaa Demmeqe Oromiyu qoqqowira Qeellem Wollaggu Zoonera iillitinota keeraano qansooti goofo lainohunni dadillu xawishsha sayisino.
Xawishshisinni qansootu aana ledote ganonna goofo iillitannokki gede baalante qooxeessubbara reqeccaabbino olluubba bande hasiisanno agarooshshe assinanni gede hattono teesaano umonsa tantanne gargadhitanno gede milishunna dagoomu wodhonna amanyooti kaajje sufanno gede assinanni yino.
Wolleggu qooxeessira xaano cancishaano Shene gaamo keeraano qansooti aana shigiggissanno goofo iillishshino yinohu kalaa Demmeqe; gano Amaaru ilama illachishshinotanna qodhaano gargarate wo’naaltino Oromote daga aana illachishshinote yaatenni huwachishinno.
Gaamo qaaqquulle, amuwanna geerra bande gano iillishatenni gobba diigate sokko amaddinotanna hexxo murtinori gambooshshe ikkase leellishshinota buuxisino.
Mootimma wo’mante gobbate qooxeessubbara hinge hinge gano iillinshanni qooxeessubbara seera agarsiisate, keerenna ga’labbo abbate hattono qansootu ga’labbi yitino heeshsho heedhannonsa gede dandiissate jawaata sharro assitanni nooha ikkirono xaano babbaxxitino qooxeessubbara cancishaano gaamo keeraano qansooti aana illachishshino gano iillishansa suffe afantannota kalaa Demmeqe qummi assino.
Hiittoo garinnino ikkiro kuni assooti Itophiya diigate hasidhanno wolqa qineessonni iillanni nooha shigiggisanno assoote ikkasinni; mootimma qooxeessu daga ledo halante hanaffinoha seera agarsiisate looso kaajjishshe suffannota egensiisino.
Kalaa Demmeqe xawishshi garinni; keeraano qansooti aana ledote ganonna goofo iillitannokki gede reqeccaabbino olluubba bande hasiisanno agarooshshe assinanni gede hattono teesaano umonsa tantante gargartanno gede kaajjinshe sunfannita xawisino.
Jeefoteno mittimmate millimmonke diigate diinu qineessino sharre ikkasenni higge higge iillitino ganora guluphinummokkinni mittimmanke kaajjinshe jawaantetenni albaange qaanfeemmo gede eeggo yaanni gano iillitinonsa qansootinni macciishshamino’’e dadille xawiseemmo yino.
Qiddist Gezaheny
Bakkalcho Ella 30 , 2014 M.D
