Addis Ababa:- Dagate riqiwamaano amaale mini gobbate babbaxxitino qooxeessuwara keerano qansooti aana iillinshoonnita mannihimmate qoosso gawajjitanno assootubba buuxxannonna aantetenni adhinanni qaafubbara malu hedo shiqishshannota addi komite uurrinsanni gede gumulino.
Amaalete mini bero harisinohu umikki loosu diri 6ki addi gambooshshinni Oromiyaho, Gaambeellaho, Wodiidi daga dagoominna manni qoqqowira, Benishaangul Gumuzete, Amaru, Affaaretenna babbaxxitino gobbanke qooxeessuwara keeraano qansooti hattono ga’labbonna hobbaate agarsiisate millissannori ga’labbote bissa aana iillinshoonni gano lainohunni shiqqinota gumulote hedo kaajjishino.
Konni garinni ganotenni raafatunni shine gundoonniri keeraano qansooti daafira mittu xiqqeessi buqqeete huuccatto assatenni hanafinohu amaalete mini; amaalete mini aliidi massagaanonni somantannore addi komite uurrinseenna hajo buuxxe amaalete mininna daga ikkado mashalaqqe afidhanno gede dandiisiisate hattono aantete adhinanni qaafora kaa’litannota amaalete hedo shiqishshanno gede gumulloonni.
Ledoteno, gobbate giddo hiikko qoqqowiranna qooxeessirano keeraano qansooti aana reyotenna bisunna jajju aana gawajjo iillishshino bissa seerunni xa’mantanno gede; deerru deerrunkunni noori mootimmate massagaano bissa ga’labbote bissanna farcote uurrinshuwa dagate hobbaatenna keere agarsiissannonna hunaano seeruni xa’mantanno gede assitara; heedhanno qaensanni darantino qansoota wirro qaensa higganno gede assate loosi rahotenni loosantanno gede hattono Itophiyu daga tenne qarru yannara hiittenne yannarano aleenni roduuwimmatenni, mittimmatenninna halammetenni uurritanno gede gumulo saynsoonni.
Dagate riqiwamaano amaale mini songaafichi Taaggese Caafo gumulote hedo shiqishi yannara Itophiyu baca daga, dagoominna manni mimmitu ledo ayirrisantenna baxante heedhannotenna babbaxxitino amma’nonna budu noowa ikkiturono sa’u 27 dirrara winxoonnihu babbadooshshe kalaqannohunna ku’u ko’oy sircho giwate assooti dagate giddo shagaggiissanno assootubba gumulantanno gede waalcho fanino yiino.
Babbaxxitino gobbanke qooxeessuwara keerano qansooti aana mannihimmate ayirrinye shollishanno garinni gawajjo iillinshoonnita lainohunni songaafichu shiqishinohu gumulote hedonni sumuu yitinota xawissinori amaalete mini miilla tittirote hedo worroonni garinni gumulantanno gede xa’mitino.
Amaalete mini miili kalaa Kiristiyan Taaddele isi widoonni; keeraano qansooti aana iillitino duuchunku Itophiyu qansooti aana iillitinote gede ammana hasiissanno yiinoha ikkanna; ganotenni shine gundoonni qansooti qaaggora gobboomitte dadillu barra lallambanni gede amaalete mini xa’mino.
Uurrinsanniti buuxxanno komite gano iillinshoonni qooxeessuwara hadhanno woyte jaddaaleeyye mashalaqqe balaxxe huntannokki gede hasiissanno qoropho assitanno gede huwachinshoonni.
Dhaaddotennino ikko wole doogonni hunote assootira angansa noori hattono yawonsa garunni fultinokkiri olluunni kayse Federaalete geeshsha noo mootimmate loosu massagaano seerunni xa’mantara hasiisannota wolenti amaalete mini miila baabba Yeshiihassaab Tseggaw hedose wortino.
Gobbate giddo keeraano qansooti aana mannihimmate ayirrinye shollishanno garinni gumulloonni assoote lainohunni shiqqinoti gumulote hedo gumulo kiiro 10/2014 ikkite mitte ittishshu huuronna mitte uynoonnikki huuronni roore huuronni kaajjitino.
Amsaalu Felleqe
Bakkalcho Ella 30 , 2014 M.D
