Arbaaminc:- Soorrote saninni Itophiyu giddo leellanno keeru hoongiranna xa leeltanno qarrubbara qaru kaimi gadachaancho ikkinohunna ani yoommoti calla ikkito woy ani gobba gashsha hoogummoro Itophiyu diigama noosi yee loosanni noohu woyyaaneeti yaatenni IFDR poolisete xiinxallo institiyuute qara dayireekiterchi piroofeeser Beyyene Phexiroosihu xawisi.
Piroofeeser Beyyene Phexiroosihu Itophiyu pireesete uurrinsha Arbaamincete quchumira “Keeru dimokiraasenna halaalaancho federaaliizime” yaanno uminni qixxeessitino “Itophiyu daafira” yitanno ba’re aana xawisino garinni; qodhote sharronni billoonye amaddinoti woyyaane kalaqosenni kayse sharretenni dagooma babbadatenni, baxxino laooshshi noonsare hordofatenninna shaatenni halaalaancho akatoomase leellishshino uurrinshaati.
Piroofeeserchu ledeno HWHT yaamantannoti cancishaano gaamo kalaqonsa gadachate; baalanka coye olu bagadinni calla tirate wo’naaltanno hunotenna qarru gaamooti yiino. Xa babbaxxitino Itophiyu kifillara babbaxxino su’minni gaancenna doddolu assoote gumultanno wolquwara badheenni nooti cancishaano gaamo Itophiya gibbanno woyyaaneeti yaatenni kaajjishe xawisino.
Woyyaane gobbate giddo kalaqqanno keeru hoonginna gobba diigate loossanno loosira qoteho Itophiyu bayirroonyenna dhaggete annimase gibbannorinna waajjitannori gobbayidi wolquwa sharreno no yaannohu piroofeeser Beyyene; tenne baala huwatte sharrensa qeelate Itophiyu daga diinnate duduwinni babbadantukkiinni mittimmatenni uurritara hasiisanno yaatenni coyi’rino.
Itophiyu daga kalaqosenni mittu wolu aana ka”e olamino ikkito dinonka; xaano dino yaannohu piroofeeserchu; mitte mittente gaancera badheenni ikkite gaancete ajanda kalaqqannorinna giira bushshitannoti hunote wolqa ikkitinoti cancishaano HWHTti yaatenni xawisino. konnira qaru korkaati cancishaano gaamo tii”inke agaramannohu dagate kiphonninna goonfenni callaati yite ammantannohuranna tennerano loossannohuraati yiino.
Itophiyu pireesete uurrinsha “Itophiyu qeeltanni suffanno” yaanno uminni 12mu quchumira qixxeessate mixidhe harissanni noohu “Itophiyu daafira” fotote daa”atonna paanaalete hasaawi ba’re konni albaanni Jigjigaho, Dirredaawaho, Hareretenna Hawaasa babbaxxitino jajjabba gobboomu hajubba aana harinsoonniha ikkanna Arbaamincete ba’re ontikkite.
Abbebech Maatewoos
Bakkalcho Ella 30 , 2014 M.D
