Addis Ababa:- Amaalammete barera beeqqitannori baalu ani maa afi’reemmo yaa ikkikkinni Itophiyu Maa afidhanno;Oosonkena maa tirfidhanno? yaannoha sinqisidhe daa hasiissannonsata xaphoomu ministirichi Abiy Ahimedi huwachishi.
Gobboomu amaalammete komishiine miilla xaphoomu ministirichi Abiy Ahimedi ledo hasaawa assitino.
Xaphoomu ministirichi hasaawu aana xawisino garinni; gobboomu amaalamme oosonkera tirfanno guma abbitanno yine agarrannite.
Gobboomu amaalamme hanqafaanchimmatenni gumulantanno gede mootimma qeechase fultino yiinohu ministirichu; amaalammete seyo roorenkanni dagganno ilamara danchare abbitanno yine ammannanni yaanni coyi’rino.
Mootimma komishiinete loosi mereero anga worate hasatto dinose yiinohu xaphoomu ministirichi Dr.Abiyi;roorenkanni gobboomu amaalammera komishiinete loosi seyaanno gede hasiissanno irko assitanno yiino.
Keeraanchimmatenni hadhanno gede hasi’nanni amaalammete bare seekkanno gede komishiinete miillara luphiimu gobboomittete annimma noonsatano qummeessino. Konni widoonni dagate riqiwamaano amaale mini widoonni dagatewiinni doorante dagginoha ikkansanni uyinoonninsa qeecha ragunni fultanno yine hexxo tungoonninsa yaannino guwursino.
Komishiine albi araarunna keeru hattono dannunna ayimmate komishiinnawiinni rosicho adhatenni gummaawate roorenkanni sharro assitanno gede sokkasi sayisino.
Itophiyunniti gobboomu amaalamme komishiine gambisaanchi pirofeeser Mesfin Ariaya isi widoonni;amaalammete komishiine balaxote qixxaawo loossa gudde qixxoowote gafi aana noota egensiisino.
Gobboomu amaalamme balaxote qixxaawo,qixxaawonna qara amaalamme hattono looso hanafanna loosu aana hosiisate harunso yaanno shoolu gafi nootano gaagiisse;qixxaawote fooliishsho loossara hasiissanno baajeettenna Istiraateejete mixo gooffeenna muli barra dagate riqiwamaano amaale minira kaajjishate sharro assinanni hee’noonnita huwachishino.
Sa’u shoole aganna giddo baca balaxote loossa qixxaawonna qixxaawote loossa loosantinota qummeesse;amaalammete harinsho illaallishshu kaarta qixxeessate, miidiyunna kominikeeshiinete hattono amaalammete guma looso harunsitanno handaarra uurrisate loossa gumulamase xawisino.
Komishiine xaa geeshsha 40 poletiku paartuwaa ledo hasaawa assaseno xawise;ledoteno 13 paartuwanni ledo addi addinni komishiinete hajo loossa harinsho hasaawa assitanni noota coyi’rino.
Komishiine aanteteno qoqqowubbatenna zoonnate deerrinni biiro fanate mixo noonsate qummeesse;biirono fa’nantanno woyte kayinni yuniversitubbatenna wolootta hale ikkitino uurrinshuwara biiro horonsi’ra dandiitannota xawisino.
Yaareed Geetaachew
Bakkalcho Ella 30 , 2014 M.D
