Hawaasa:- Sidaamu qoqqowo ikkara albanni rumuxxite keeshshitinotanna danchu gashshooti xa’mubba ikkite keeshsitino qarrubba badatenni deerru deerrunkunni dawaro afidhanno gede assinanni hee’noonnita qoqqowu pirezidaantichi kalaa Desta Ledamo egensiisi.
Sidaamu daga umise umose gashshate, talleenyunna latate xa’mo kayissanni seeda yannara keeraancho sharro assitanni keeshshite gobboomu daggino soorronninna bayi’riidi seeri kaiminni dagate xa’mo dawaro afidhino yiinohu pirezidaantichu; daganniti latate xa’mo ledo amadisiisaminohunni ka’anni keeshshitinoti danchu gashshooti xa’mubba dawaro afidhanno gede assinanni hee’noonnita xawisino.
Konni garinnino albaanni rumuxxite keeshshitinota danchu gashshooti xa’mubbara dawaro qollanni dagate hasattono bande loonsanni hee’noonniha ikkanna aanteteno danchu gashshooti qarrubba gede xa’mo ka’annokki qoqqowo assate loonsannita qummeessino.
Sidaamu dagoomu qoqqowo safi’niha 2ki diro Ella 27/2014M.D faajjetenni ayirrinsoonniha ikkanna kuni barri Sidaamaho qeellete barra ikke diru dirunkunni ayirrisamannotano coyi’rino.
Qoqqowu daga taalleenyunna latate xa’mo deerru deerrunkunni dawaro afidhanni dagginota qum meessinohu pirezidaantichu; qoqqowu mootimma safantu gedensaanni sa’u lame dirrara babbaxxitino handaarranni gummaammanna jawaachishshanno loossa gumula dandiinoonni yiino.
Pirezidaantichu kalaa Desta xawishshi garinni; Sidaamu daga umise umose gashshatenna woloottu gobbanke dagante gede taalo latate seeda yannara assitino qaraartino sharronni qeelle afidhu gedensaannino xaa yannara wo’munni wo’ma latishshu widira higgino.
Daganniti poletiku xa’mo dawaro afidhu kawa qoqqowoho ge’ino ga’labbonna keeri kalaqamasinni xaa yannara da’’attote, investimentete hattono babbaxxitino handaarranni dooramanno qoqqowo ikkanni daynota qummeessino.
Qoqqowu mootimma safi’ra adda ikkitu gedensaannino sa’u lame dirrara dagate hasatto badatenni baxxinohunni doogga, xalala anganni waa, caabbicho hattono wolootta dagoomaho owaantenna horo uynannore uurrinshuwa wonshate loosira balaxo uyne loonsoonnitano pirezidaantichu xawisino.
Ikkollana, dagate hasattonna xa’mora mittu hashshinni dawaro qollara dandiinannikkita huwachishinohu kalaa Desta; aantete sharronke laalchonna laalchimma lossate, loosu hoonge ajishatenni hattono baicho assoote sharramatenni edagate heeshsho woyyeessate aana illachishshinota ikkitanno yiino.
Sidaamu daga budunni araarunna qarrubba tirrannihu ‘Affini’ amanyoote horoonsi’ratennino qoqqowoho duuchunku qooxeessira keerunna ga’labbo ge’anno gede assa dandiinoonnihura albillichono konne dancha balchoomanna latishsha kaajjinshe sufisa baalinke qeecha ikka hasiissanno yaanniiti huwachishinohu.
Qoqqowu daga heeshsho woyyeessatenni Jireenyu widira reekkate kaayyo angankera noohura noonke jiro garunni latinse horoonsi’ratenna latate yanna xaati yiino.
Qoqqowoho looso hooggino qansootira hasiisanno bikkinni loosu kaayyo kalaqate dandiinoonnikkita jawa jifo gede kaysinohu pirezidaantichu; qansootuno looso baxxenna kalaqqe loosate laooshshu soorro abbita geeshsha qoqqowu mootimma agarrannise yawo fultannotano qummeessino.
Qoqqowoho sa’u lame dirra giddo miinjunni, dagoomittetenna poletiku handaarranni loonsoonnire jawaachishshannonna hexxo uytanno loossa kaajjinshe sufisiisatenna harancho yanna giddo dagate hasattonna xa’mora dawaro aatenni danchu gashshooti xa’muwa ka’annokki qoqqowo assate deerru deerrunkunni dagate ledo halammanni loonsannitano coyi’rino.
Amsaalu Felleqe
Bakkalcho Ella 30 , 2014 M.D
