Addi Ababa:- Qoqqowoho shekkeerete dhibbi wirro hala’lanni noohura daga hasiissanno qoropho assatenni umonsa dhibbunni gargadha hasiissannonsata Sidaamu qoqqowi fayyimmate biiro xawissu. Dhibbuu taraawo bikka sai diri labbanno yanna ledo heewisiinsanni woyte tayixe roorre leeltinota biiro egensiissino.
Qoqqowu fayyimmate biiro dhibbu gargarooshshinna fayyimmate agarooshshi dayirektoreete dayirekiterchi kalaa Indalkachew Demmeqehu Itophiyu Pireesete Uurrinshara xawisino garinni; sa’u Shoolenna Onte dirra giddo Sidaamu qoqqowi shekkeerete dhibbinni co’icha ikke keeshshinota qummi asse; sai dirinni hanafe kayinni dhibbu galagale kalaqamate malaatta leeltinota coyi’rino.
Konni alba Hawaasi quchumi, Hawaasi
Gaangaawi woradi, Tuula, Lokka Abbayyu, Bilaatte Gaangaawinna Alatta Cuukkote woradda shekkeerete dhibbi taraawonni balaxaano ikkitanna tayixe diro kayinni qoqqowu giddo Cirrete, Hookkonna Caabbe woradda dhibbu hala’le leellino qooxeessubba ikkansa bandoonnita dayirekterchu xawisino.
Konninnino tayixe dirinni dhibbu taraawo bikki sai diri ledo heewisiinsanni woyte erotenni lexxinota kalaa Indalkachew egensiisino.
Konni kaiminni woraddatenna olluubbate geeshsha dirrine daga baqqi assate looso loonsoonnita kayisinohu dayirkterchu; baxxinohunni wayi garannokki gedenna dhibbu malaatta heedhuro qooxeessaho afamanno fayyimmate keella marre rahotenni xagisira hasiissannota dagate huwanyo kalanqanni hee’noonni yino.
Tayixe dirinni gargarooshsheho horonsi’nanniri kemikaalete kiifattonna Agobere lawino uduunni nookkita qummi assinohu kalaa Indalkachew; tenne hajo fayyimmate ministerera egensiinsoonnita coyi’rino; gobbate gede gargarooshshu duunni laalchi aana qarru nootano lede xawisino.
Jeefoteno dayirekterchu; qoqqowoho shekkeerete dhibbi galagale hala’lanni noota daga afa noonsa yino. Konni daafira daga biinne qalantannokki gede dandaamannore assatenni dhibbu finco ajishate qeechansa fula hasiissannonsa.
Baxxinohunni baadiyyete daga weesete giddo ofollanno woyi hattono hiiqqamino bacci giddo kofamanno woyi biinne qalantanno gede assannohura togoo dargubbara wayi ofollannokki gede duna hasiissanno. hattono dhibbu malaatta leelturo rahotenni qooxeessaho afamanno fayyimmate keella maratenni buuxo assi’ranna uynanni xagga garunni adha hasiissannota huwachishinno.
Qiddist Gezaheny
Bakkalcho Ella 23, 2014 M.D
