Addis Ababa:- Qoqqowoho 2014M.D hawadi dancha fajjo loosinni boco Biliyoone mootimmate fulo gatisate mixo amande qixxaambanni hee’noonnita Sidaamu qoqqowi jireenyu paarte wedellu liige borro mini egensiisi. Qoqqowoho tayixeha hawadi dancha fajjo looso Maaja 1, 2014 M.D nni faajjetenni hananfannita borrote mini sooreessi kalaa Aklilu Alemuhu Bakkalcho Gaazeexira xawisino.
Tayxe hawadi dancha fajjo looso 11 qara qara ikkitino handaarra aana loonsannita coyi’rinohu sooreessu; wedellu tantanonna Sivilete daga lede 500 kume ale ikkitanno daga beeqqaano assate hendoonnita lede xawisino.
“Sidaamu qoqqowira loonsanniha hawadi dancha fajjo loosi gumunni bikkinanniha calla ikkikkinni bude assi’noonni’’ yinohu kalaa Aklilu; 2020 M.D hananfe loonsanni keeshshinoonni hawadi dancha fajjo loosinni haammata illete leellanno guma borreessiisa dandiinoonniha ikkasi qummi assino.
Konnirano sai 2014M.D hawadi dancha fajjo loosinni 352 minu wiliilchira mine mina dandiinoonnitanna 5500 ale Yunite mundee uynoonni yinohu borrote mini sooreessi; konni gobbaanni loosidhe galtino dagara gate shuqunatenni kaa’lo assinoonnita lede xawisino. hattono dhuka ajjino maatera daga kakkayisatenni woxe gamba assinoonniti sai diro hawadi loosinni gumulantino loossa ikkansa qummi assino.
Ledotenni hatte yannara sayikki doyicho haanju sumudi mixo harunsine chiginye kaansoonni yinohu kalaa Aklilu,tayixeno gobbate gede amandoonni shoolki doyicho haanju sumudi mixo harunsine hawadi dancha fajjo loosinni Sase Miliyoone chiginye kaasate mixo amandoonnita qummi assino.
Qoqqowoho gumullannihu dancha fajjo loosi gobbate latishsha rahisannohanna mittimma kaajjishannoha ikkasi baalanti dagoomu bissa huwatte uminsa beeqqo assatenni gobbate lophoranna latishshira qeechansa fultanno gede sokka sayisino.
Tayxehu hawadi dancha fajjo loosi Maaja 1, 2014 MD nni hanafe wocawaaro 30/2015 M.D jeefamannota borrote mini sooreessi kalaa Aklilu Alemuhu uurrinshinkera egensiisino.
Qiddist Gezaheny
Bakkalcho Ella 23, 2014 M.D
