Hawaasa:- Daa’’attote jironke garunni horonsi’rate dubbu lubbuwa agarooshshira hasiisanno illacha tuga hasiissannota Dubbu saadanna agarooshshi biilloonyi egensiisi. Biilloonyeho seeda dirrara loosinohunna handaaru xiinxallaanchi Dr Faanueel Kebbedehu ‘’ Itophiyu Daafira’’ yaanno uminni Hawaasi quchumira qixxeessinoonni faajjete hasaawi aana shiqishino kaimu hedonni xawisanni; dubbu saada agarooshshi haammata horo noosiha ikkanna daa’’attote noosi qeechi luphiimaho.
Dr Faanueeli xawishshi garinni; dubbu saada agarreemmohu horonsirateeti. Ninke calla ikkinummokkinni aantino ilamano horonsidhannonsa gedenna ilama suffanno gedeeti yiino.
Qooxeessankeno ikko kalaqamu jironke garunni agara hoongummoro ilama suffara didandiitanno yiinohu Dr Faanueeli; korkaatuno heeshshonke safantinohu kalaqamu aanaati yiino.
Qooxeessanke garunni amada hoogankenni iillitannonke gawajjo akkimale ikkitannohura baalunku manni kalaqamu jiro agarooshshira umisi qeecha fula hasiissannosita huwachishino.
Gobbankera qooxeessu agarooshshi loosi 15 sanira Zere’’a Yaaqoobi yannara hanafaminota qummi assinohu Dr Faanueeli; yannate Aliyye gobbate qooxeessira Addis Ababa daanni mite mite muro sirsannota qummi assino. Masigiiddatenna amma’note minna hoowe giddoonni leellannohu agarooshshu amanyoooti techo noo kalaqamira jawa kaa’lo assinotano xawisino.
Gobbankera 74 ikkitannore agarooshshu base bandoonnitanna kunino qole xaphooma gobbate xibbuunni 10% diwannota Dr Faanueeli qummi assanno.
Konni gobbaanni Itophiyu giddo laynkihanna jawiidiha qansaano saada danna taysino hodhishsha Gaambeellunni Sudaanete geeshsha harinsanni yiinohu xiinxallaanchu; konneno Daa’’attote bue assine horonsira dandiinanni.
Konni gobbaanni Itophiyu kalqete dubbu saada jironni dureeyyete yinanniri 25 gobbuwanni mitto ikkasi kulino.
Dr Faanueeli xawisino garinni; dubbu saada qooxeessaho noonsa horonni gobbaanni miinju irkonsano luphiimate. Lawishshaho; mitto Gaarraancho 15 kume doolaare hirranni. Mitto Ambooma 180 doolaare hirranni; mitto bullicha 60 doolaare hirranni; tini jawa jirooti.
Wole widoonni xibbuunni 80% daa’’ataano dubbu saada daa’’atate dagganno yiinohu xiinxallaanchu; handaaru xibbuunni 40% loosu kaayyo kalaqannota qummi assino. Kuri seekkine huwatanna dubbu saada horo luphiima ikkase huwatatenni agarooshshe assa hasiissanno yiino.
Konnira biifadonna ille goshooshanno qooxeessa kalaqatenni daa’’ataano goshooshanna eo abbatenni umonkeno ikko gobbano kaa’la dandiinannita Dr Faanueeli huwachishino.
Qiddist Gezaheny
Bakkalcho Ella 23, 2014 M.D
