Adds Ababa:- Aliyye ola keeru doogonni tirate Jireenyu paarte mereerimu komitenna loosu gumulsiisaano Sase massagote hanqafo wortino. Keeru sharro guma gantannokkiha ikkiro; gano gargadhate hasiissanno qaafo adhate gadachantannota egensiissino.
Paartennihu mereershu komite miili dokter Gedeyoon Ximootiwosihu uyno xawishshinni; paartenniti mereershu komitenna loosu gumulsiisaano Aliyye gobbate qooxeessi oli keeru doogonni tidhama hasiissannosita tenne lamala giddo assitino gambooshshinni muro sayissino.
Keeru harinsho gumulantanno woyte kayinni sase qara qara massagote hanqafo harunsitino doogonni yitanno sumimme assinoonnita qummi assinohu dokter Gedeyooni; umi massago keeru harinsho sumimme hiittenneno bayiriidi seeri gumulonna seera agartinota ikka nooseta murroonni.
Laynki deerrinni keeru harinshonnino ikko gumunni gobbate horo agartinota ikkitanno gede komitta illacha tugansa qummi assinohu dokter Gedeoni; sayikki deerrinni keeru harinshonni gumullanniha ikkiro harinsho yannaasincho assa nooseti Afriku mittimma ikka nooseta muransa xawisino.
Noonke qarra uminke geerrinninna amma’note annuwinni tira noonke yinohu dokter Gedeyooni; hajo kayinni insa aleenni ikkituro ajay ajeenna Itophiyu umisi uurrisirino Afriku mittimma widoonni gumulama nooseta murroonni yino.
Konninnino keeru harinshono ikkito gumu bayiriidi seeri gumulo harunsino garinninna gobbate horo agarsiisino garinni Afriku mittimma widoonni gumulamannota huwachishinno.
Konni alba keeru doorsha xiinxallitanno komite uurrinse xiinxallo assinanni keeshshinoonnita kayisinohu dokter Gedeyooni; xiinxallote gumi ripoorte shiqqinota egensiisino.
Ripoorte macciishshitinoti paartenniti mereershu komitenna loosu gumulsiisaano komite gobbate aliyye kifilera kalaqantino kipho keeru doogonni tira hasiissannota muro sayisihu gedensaanni muro harunsitanno komite uurrinsoonnita qummi assino.
Keeru harinsho ledote mundee du’nantannokki gede, hananfoonnita gobboomu amaale baalanka hanqaffinota ikkitanno gedenna olunni gawajjantino qooxeessubba wirro uurrisate kaa’litannota ammanne paarte murtino keeru harinsho muro kaimu gede horonsi’noonnita huwachishinno.
Keeru harinsho hasi’noonni doogonni gumulantannokkiha ikkironna HWHT gaamo iillishshanno gano suffannoha ikkiro hasiissanno qaafo adhate qixxaawo kaajjisha hasiissannota paarte sumuu yaase dokter Gedeyooni xawisino.
Konnira kaa’lanno gede hasiissanno qaafo adhate hajo la’annonsari gargarooshshu olanto, keeru uurrinshuwanna adawu bissa hasiissannota qorophote qixxaawo kaajjishshe sufa hasiissannonsata paarte huwachishase xawisino.
Dokter Gedeyooni xawishshi garinni; Aliyye oli mootimma gadachante e’inoha ikkanna higge higge keereho noose hasatto leellishate ola uurrissino. Aanteteno keeru harinsho gumulamara hasiisanno doorsha baalanka horonsidhanno. Ikkeennano keeru harinsho gumulantannokkiha ikkironna gano suffannoha ikkiro mootimma seera agarsiisate looso kaajjishshe sufa hasiissannoseta jireenyu paarte mereershunna loosu gumulsiisaano komite mu’ro sayissino.
Qiddist Gezaheny
Bakkalcho Ella 23, 2014 M.D
