Addis Ababa:- Muli barruwa giddo Oromiyu qoqqowira keeraano qansooti aana kakkachimmate assoote gumultino jaddaasine sirchono ikko amma`no noonsakki soqqaamaanooti yaatenni jireenyu paarte layinki pirezidaantichi kalaa Adem Faarah coyi`ri.
Kalaa Adem Faarah uyino xawishshinni; kakkachimmate assoote gumultannorinna soqqamaanote illachi sirchunna amma`note diphanonni gobba diigateeti yino.
Konni sa“eno muli yanna giddo hanafamannoha haaroo`mate kofatto sayikki doyicho waa wonshatenna layinki terbayinete looso hanafo gufisa hunote gaamoha qara illacha ikkinota buunxoonni yaatenni coyi`rino.
Keeraanote aana gano iillishshino haammata cancishaano gaamo aana hasiissanno qaafo adhinanni hee`noonnitano xawisino.
Konninnino shinoonnirinna qafandoonniri cancishaano miilla noota xawise; amadantinori mereerinnino babbaxxitino ayimmanna amma`note amanyooti noonsari afantinota coyi`rino.
Kalaa Adem xawishshisinni; cancishaano gaamora woxu irko assatenninna hunote sokko aatenni bobbaassaannori Itophiyu diinnaati; kuri diinna mamooteno goxxannokkita leellishshino. Iillinshoonni ganono daganna mootimma babbadate illachishshinote yino.
Baxxinohunnino hawadi yannara haammata daga beeqqitannota latishshu loossa gufisatenna illacha xuruurate shagaggissanno gano keeraanote aana iillishshinota kalaa Adem xawisino.
Kuni gobboomu illachi tolannokki gede hedatenni keeraano qansooti aana shagaggisannonna kakkachimmate assooti gumulamino yiinohu kalaa Adem; paartete loosu gumulsiisaanonna mereerima komite kakkachimmate assootinni macciishshaminonsa dadille xawissinota qaagiissino.
Diinnankenni woxu irko afidhe kakkachimmate assoote gumultino soqqamaasine aana adhinanni qaafo kaajjitanno gede jireenyu paarte mereerima komitenna loosu gumulsiisaano komite kaajjishshinotano coyi`rino.
Amadisiise giwaanchimma gargadhate loosi illacha uynanni hajo ikkinota paarte sumuu yitinota xawisinohu kalaa Adem; giwaano wolquwa dijitaalete tekinoloojenna dijitaalete miinju halashsho horonsidhe qarra kalaqqanni nootano buuxisino.
Konni sa“e badhera gatanna dimokiraasete hedo hala`la hooga gobba jifanni afamanno yinohu kalaa Adem; ikkinohurano mootimma giwaano gargadhatenni qarra kalaqqannori aana qaafo adhitanno yiino.
Wole widoonni paarte gobbate dimokiraasete loossa aana hasaawa assitinota kalaa Adem kayisino. Itophiyu haammata jajjabba gobbuwa illachishshanno Afriku buudi qooxeessa ikkase gede polotiku harinshuwase qorophotenninna gobbanke horo ayirrisiisanno garinni dipploomaasete loossa kaajjite sufa noonsata sumuu yinoonni yiino.
Kalaa Adem xawishshi garinni; kalqenniha polotiku qarra lainohunni gobbanke horo agarsiisatenni sa“e taaltino harinshuwa harunsa hasiissanno gede hasaawa assinoonni. Itophiyunniha dipploomaasete looso kaajjishate qarunni giddoyidi reqecishamme ajishatenni hanafaminoha beeqqisaancho gobboomu amaale sufa hasiissanno gede kaajjinshoonni.
Abbebech Maatewoos
Bakkalcho Ella 23, 2014 M.D
