Addis Ababa:- Wedellu dhaggete sumudansa wortanno hawadi yanna dancha fajjo loosira qixxaabbanno gede IFDR laynkihu Xaphoomu ministrchinna Gobbaydi hajo ministrchi kalaa Demmeqe Mekonninihu woshshatto assi.
Kalaa Demmeqe Mekonninihu ‘’Danchumma Itophiyu Lophora’’ yaanno uminni 2014 M.D hawadi yanna wedellu dancha fajjo owaantenna danna tayisse sa’anno danchummate owaante mixo hanafisiisi yannara xawisanni; wedellu dhaggete sumudansa wortanno hawadi yanna ikka noonsa.
Gobbate wolambinate hunate assinannita giddoyidinna gobbayidi xiiwo gargadhatenna gobboomu horo agarsiisate mootimma gumultanni nooti wo’munku handaari sharro gummaame ikkitanno gede wedellu dancha fajjo loosi owaante irkisa hasiissannota kalaa Demmeqe coyi’rino.
Hananfoonniti lophote harinsho gummaame ikkitanno gede wedellu qansichimmate qeechansa fula hasiissannonsa yinohu layinkihu xaphoomu ministrchi; wedellu hawadi yanna danchummate loossa gumulsate qixxaabbinore ikka noonsata huwachishinno.
IFDR meentunna dagoomittete hajo ministrcho dokter Ergooge Tesfayeti ise widoonni; dancha fajjo mixo wedellu uminsa kakkaooshshinni, dancha fajjonninna hasattonni ka’e dagoomunnita dagoomittete mittimmanna miinju horonsiraanchimma sharro irkisate uminsa qeecha fultanno gede dandiisate illachishshinote.
Dagoomuno dancha fajjo owaante gumultanno wedellira hasiissanno irkonna kaa’lo assitanno gede xa’mitino.
Hawadi yannanni calla harinsanni dancha fajjo owaantenni 19 Miliyoone wedelli 12 handaarrara bobbaasatenni 40 Miliyoone ikkitannore dagoomu bissa horonsiraano assate fajjitinotanna konninnino 11 Biliyoone birra hendanni jiro gatisate mixo amandoonnita xawissino.
Wole widoonni dancha fajjo owaante dagoomittete xiiwo shotisatenni aleenni wedellu gobbansa affanno gedenna dagoomunniha dancha balchooma huwattanno gede kaayyo kalaqqannota ikkase kayissino.
Sa’u arrinna hawadi yannanni dancha fajjo loosira 21 Miliyoone ali wedelli beeqqite 38 Miliyoone ale ikkitanno qansootira 10 Biliyoone birra hendanni owaante uytinota mashalaqqe leellishshanno.
Layinkiha xaphoomu ministrchanna gobbayidi hajo ministrcha kalaa Demmeqe Mekonniniha lede jajjabbu mootimmate loosu sooreeyye gobbate deerrinni gumulantanno dancha fajjo owaante gummaame ikkitanno gede noonsa murciraanchimma buuxissanno malaate sheemaatu aana malaatissino.
Qiddist Gezaheny
Bakkalcho Ella 23, 2014 M.D
