Hawaasa:- Jireenyu Paarte Meentu Liige umikki songo Hawaasi quchumira ha’rissanni afantanno.
Barraho wosina hawalle keerunni daggini yiinohu Sidaamu Qoqqowi Pirezidaantichi Kalaa Desta Ledamohu, meentu muro aanchimma, beeqqonna horaameessimma buuxantanno gede mamarinnino aleenni Jireenyu Paarte loossanni no yiino.
Jireenyu Paarte Lay/Pirezidaantichinna loosu gumulsiisano komite miil kalaa Adem Faara hisi widoonni, meentu duuchunku handaari horaameessimma buuxisiisate paartensa sharrantannota coyi’rino.
Kalaa Adem, Jireenyu Paarte meentu duuchunku handaari horaameessimma buuxisiisate sharrantonno gede pirogiraamese giddo reqecci assite wortino yiino.
Meento massagaanchimmate widira abbate ragaanni paartensa hala’lado loossa loosase kaysinohu lay/pirezidaantichi, baxxino garinni meentoho noonsa ikkadimma kaima assatenni qara sekterere baala massagaanchimmatenni gaamame gumaamma ikkinonna Itophiyu Jireenya ollohate assinanni gaarira jawa qeecha fulino yee; paarteno kuni aantetenni kaajje sufanno gede kaajjado looso loossanno yiino.
Jireenyu Paarte meentu horaameessimma buuxisiisate loossino loosinni woyyimma leeltinotano huwachishe; paartensa kayinni dayno gumi ikkino yite adhitannokkitanna aantete loosso hasiissannota coy’rino.
Meentu noo baycho baala horaameessimmansa lophitanno gede Meentu Liige tantano kaajjisha hasiissanno. Jireenyu Paarteno uurrinshaamu dhukise kaajjanno gedenna amaddino mixo gumulantanno gede meentu beeqqo buuxisiisa qara ikkitinota coy’rino.
Jireenyu Paarte Meentu Liige Pirezidaantitte Baabba Meseret Mesiqeliti ise widoonni, meentu politiku beeqqo yannatenni yannate widira hala’litanni daase coy’ratenni; gobbate deerrinni qara qara ikkitino dargubbara meento beeqqisiisatenni gobbate ikkanno meento massagaano kalaqa dandiinanni yitino.
Amadisiisseno Baabba Mesereti, meentu duuchu handaari beeqqonna horaameessimma buuxisiisate deerru deerrunkunni noota meentu liige miilla kakkaysatenni songo baxxino illachinni hasaawa assitanno gede xawissino.
Jireenyu Paarte Meentu Liige umikki songo bero hanaffe Hawaasi Quchumira hadhanni afantanno.
Addisu Adoola
Bakkalcho Ella 23, 2014 M.D
