Hawaasa:- Meento addi addi loosu handaari aana beeqqaano assatenni dhukansa lossanna horonsiraanchimmansa buuxisa gobbate gatamarshira luphiima qeecha afidhinota Hawaasi Quchumi Gashshooti Quchumu Latishshinna Konistraakshiinete Biddishshi xawisi.
Biddishshu babbaxxitino hajo la’annonsa loosu minna ledo halamatenna addi addi bissa beeqqisiisatenni meentu wo’munku handaari horonsiraanchimma aana illachishshino bare Hawaasi quchumira harisino.
Hawaasi quchumi gashshooti quchumu latishshinna konistiraakshiinete biddishshi meentu horonsiraanchimma loosu handaari qineessaancho dukko Alemtsehay Negaashiti barete illacha lainohunni Bakkalcho Gaazeexira xawissanni; quchumaho meentu addi addi loosu handaarira beeqqaano ikke e’’otenni, baattote horonsira anchimmanni, taalleenyunninna koo-tee kaima assite iillitannonsa gano gargarate illacha tunganni gedenna handaaru handaaru massagaano aana huwanyo kalaqate ikkinota coyidhino.
Konninnino barraho ba’rete aana Hawaasi quchumi addi addi loosu hadaarinni koyisantino bissa afantinoha ikkanna qarunni e’’ote, doogotenna hodhishshu hattono loosunna dandoote loosu handaari bissa afantino; ledoteno amma’note massagaanono leeltino.
Togo assinoonnihuno kuri bissa handaari handaarinsanni meento taalo horonsiraano assitanno harinsho kalaqidhanno gede qaagiissate ikkinota kultino.
Konni gobbaanni barraho meyaa daddalaano waaxo maamara uurrinsoonniha ikkanna maamaru uurrahu qaru illachino quchumaho dhuka ajino meento irkisatenni miinjunni umonsa dandaanno gede ikkadda assate ikkinota dukko Alemtsehayi uurrinshankera xawissino.
Ledoteno maamaru wole quchummanna gobbuwanni rosicho adhatenni quchumaho woyyaawino looso kalaqatenna wo’munku latishshu loosi giddo bobbahe maamaru su’minni uminsa uurrinsha uurriste addi addi looso loosannota qummi assitinno.
Jeefoteno dukko Alemtsehayi meento jawaachisha latishshaame hedooti yaatenni quchumaho dhuku noonsakkirenna loosa dandaanno meento irkisanna miinjunni ikkadda assa baxxinohunni handaaru handaaru massagaanowiinnibaalunkuwiinni agarantannota ikkase huwachishshino.
Qiddist Gezaheny
Bakkalcho Ella 16 , 2014 M.D
