Addis Ababa:- Gano iillitinonsa qooxeessubbara keerenna hobbaate qola xaano balaxo uyneemmo hajooti yee Xaphoomu ministirchi Abiy Ahimed egensiisi.
Xaphoomu ministirchi Abiy Ahimed dagoomitte xaadooshshi qoolisira saysino sokkanni “Keeraano qansooti aana seeru gobbaanninna mootimmate uurrinshuwa ikkitinokki wolquwanni iillitanno ganonna dagate jajji aana iillinshanni dano adhamooshshe diafidhino.
“Muli yanna kawa Benishaanguletenna Oromiyu qoqqowubbara qaru illachinsa daga cancisha ikkino bissanni keeraano qansooti aana iillinshoonni barshenna shagaggiisanno assooti cincine sa`nanniha dikkino.
Konni ledo amadisiisame IFDR Miseessu Xaphoomu ministirchinna Gobbaydi Hajo ministirchi kalaa Demmeqe Mekkonnini dagoomitte xaadooshshi qoolisira saysino sokkanni; ga`labbo agarsiissanno bissanna daga mittimmatenni adhitino qaafonni shollitino cancishaanonna giwaano gaamo rabbisate qaafo adhitanni afantanno.
Muli yanna giddo Gaambeellu qooxeessira assitino wo`naalshi seya hoogeennansa galchimu Wollaggira Gimbi qooxeessira keeraano qansooti aana baxxinohunnino qaaqquullunna meentu aana gumultino doddoli lowo geeshsha mararsannohonna mannihimmate akatoomi noosikkiho yiino.
Kalaa Demmeqe babbaxxitino qooxeessubbara tini gaamo gumultino qaafonni keeraano daganke aana iillitino ganonni macciishshaminoe dadille xawisanni; mootimmate widoonni seera agarsiisate qaafo kaajjite suffannota buuxisammora baxeemmo yiino.
Aantete gano iillitinonsa maate jaawaachishate, irkisatenna wirro uurrisate loosi illachunni loosamannoha ikkanna; cancishaanonna giwaano seeraho shiqishate loosi kaajje sufannotano xawisino.
Amaaru qoqqowi pirezidaantichi Dr Yiliqaal Keffaale Oromiyu qoqqowira galchimi Wollaggu zoonera Gimbi woradira Tole olliira cancishaanchu Shane keeraano daga raafatunni shaatenni iillishino barshenni macciishshamminosi dadille xawise; tini gano iillitinonsa maatera sheshe halcheemmo yiino.
“Kuni assooti gobbanke cancishaanote anganni co’isate hananfoommo gaado kaajjinshe sufate gobbaanni wolu doorshi noonkekkita leellishannoho” yeeno pirezidaantichu egensiisino.
Abbebech Maatewoos
Bakkalcho Ella 16 , 2014 M.D
