Addis Ababa:- Yirgaalamete qinaabbino giwirinnu laalcho qineessinanni paarke 140 kumi ali loosidhe galtino dagara dikkote mittoo’ma kalaqqinota Sidaamu qoqqowi Industirete paarke latishshi korporeeshiine xawissu. Agro-industirete paarke dhuka lossate illachishino hasaawano harinsoonni.
Korporeeshiinennihu qaru loosu harisaanchi kalaa Memmiru Moke; Agro Industirete paarke dhuka lossate illachishino hasaawa Yirgaalamete quchumira harinsi yannara Itophiyu pireesete uurrinshara xawisino garinni; Yirgaalamete giwirinnu laalcho qineessinanni paarke e’ino latisaano loosidhe galtinorinna mittimmate loosi maamarra ledo xaadisatenni qinaabbe loossanno gede assinoonni. Paarke e’ino latisaanono 140 kume ale ikkitanno loosidhe galtino daga ledo kalaqqino dikkote mittoo’manni giwirinnu eo qooxeessinsara afi’ra dandiitino.
Industirete paarke giddo addi addihu malawu qineesso, buna yannaasincho doogonni qixxeessite hirtannorinna Abukaadote Zayte laashshitanno faafrikka hee’ransa qaru loosu gumulshaanchi qummi assino.
Paarkete giddo afantanno Agro-Industirete laashshaano mereerinni Sanvad yinannihu Abukaadote Zayte laashshinanni faafirikira calla 88 kumi loosidhe galtinori ledo eote shiqishonna dikkote mittoo’ma kalanqoonni. WBM yinannihu wolu zaytete faafrikino 44 kume loosidhe galtino dagawiinni laalcho adhe loosanni afamanno yiino.
Ledoteno paarkete afantannori adote, malawunna bunu laalchi qineesso faafrikka qooxeessinsara afantanno mittimmate loosi maamarra ledo laalcho shiqishshanni mitteenni loossanni afantannota xawisinohu kalaa Memmiru; konninnino 3 kumi ale ikkitanno loosidhe galtino dagara suffino eo kalaqantinonsata kaysino.
Ledoteno Yirgaalamete giwirinnu laalcho qineessinanni paarke e’e loosate xa’midhino dureeyye hee’ransa qummi assinohu kalaa Memmiru; 21 laashshaano paarke e’’ate xa’mo shiqishsheenna sumimme assinoonnita egensiisino.
Sumiimme assitino dureeyye mereerinni gatamarsha jeefisse womaashshsu shiqisho agadhitannori no. Hattono sheede mina hanaffinokkirinna harinshonsa laafa ikkitino laashshaano rahotenni minte jeefissanno gede sharro assinanni hee’noonni yiino.
Harinshote aana noo investimente loosu giddora eessa dandiiniro ledotenni loosidhe galtinorira dikkote mittoo’ma kalaqa dandiinanni yiino.
Sidaamu qoqqowi Industirete paarkuwa latishshi korporeeshiine boordete gambisaanchinna qoqqowu womaashshu biiro sooreessi Dr Araarso Gerremew isi widoonni; paarkete afantanno ijaarra laalcho lossatenni dikkote mittoo’ma halashshatenna laalchu isilanchimma woyyeessate widoonni ledote sharro hasiissannota coyi’rino.
Industirete paarke xa noo dhuki aleenni loosa dandiitannotanna giwirinnu qineessora injiitino basera afantannohura ledote daga horonsiraano assate dureeyyeno ikkito hajo la’annonsa bissa konni aleenni loosa hasiissannonsa coyirino.
Qoqqowu noosi womaashshu dhukinni Industirete paarke roorenkanni tantanate sharro assanni afamannota qummi asse; Investerootuno paarke eatenni uminsa sheede latissanno gedenna qooxeessaho nooha giwirinnu laalcho qineessatenni dikkote shiqishshanno gede xa’mino.
Yirgaalamete qinaabbino giwirinnu laalcho qineessinanni paarke 294.3 hektaare baatto aana ofoltinoha ikkanna 11 sheedda minnoonni. Industirete paarke 2014M.D 5.7 Miliyoone Doolaare gobbaydi soorro abbitannoha ikkanna; 7,100 loosaasinera uurrinshunna yannate geeshshi loosu kaayyo kalaqqinota xawinsoonni
Qiddist Gezaheny
Bakkalcho Ella 16 , 2014 M.D
