Addis Ababa:- Itophiyu pireesete uurrinsha lame doychonni 15 kume ale maxaaffa abrihooti maxaafu minira baraarsitino.
Abrihootira maxaaffa baraarsitino midiyubba mereerinni Itophiyu pireesete uurrinsha luphiima kiiro noose maxaaffa aatenni albisaancho ikkitannota xaphoomu ministirchi borro mine riqiwe maxaafa haarinohu Dokter Taamraat Haile xawisino.
Xaphoomu ministichi borro mini riqiwamaanchi dokter Taamraati Haile maxaaffa haa`ri yannara xawisino garinni; Itophiyu pireesete uurrinsha umihunni ero ikkanno maxaafa layinki doychonni abrihooti maxaafi minira baraarsitino yino. Abrihooti maxaafu minira maxaaffa baraarsitino midiyubba mereerinni Itophiyu pireesete uurrinsha 15 kume 4 xibbe ale maxaaffa aatenni massaganni no yino.
Abrihooti daafira hendanni woyte attamote midiy ledo babbaxxannoha dikkino yinohu riqiwamaanchu; Awroppaho Abrihooti hedaasine borruwansa shiqishshannohu gaazeexuwatenninna matseetuwatenniiti. Abrihootete laooshshenna pireesete looso bande la`nanniha dikkino. Tennenkuraati Itophiyu pireesete uurrinsha hanafotenni hanaffe maxaaffa gamba assate looso kaajjishshe uurrinshuwanna hallanyoota qineessitanni luphiima kiiro noose
maxaaffa abrihootira baraarsitinohu yino. Maxaaffa gamba assatenni assinoonni kaa`lora Itophiyu pireesete uurrinsha galate; albillichono kuni loosi kaajje sufanno gede xa`mino.
Itophiyu pireesete uurrinsha qara loosu gumulsiisaanchi kalaa Geetinnet Taaddese maxaaffa uy yannara xawisino garinni; abrihooti maxaafu mini loosame adda ikki gedensaanni xaphoomu ministirchi maxaaffa gamba assino yiita Itophiyu pireesete uurrinsha massagooshshu qeecha adhite umi doychonni loosaasinetewiinni ontu barrinni 5 kume maxaaffa gamba assatenni uytino yino.
Layinki doychonni heeshshote dirinni yitannotenni maxaaffa gamba assatenni gaado harinsoommo yinohu kalaa Geetinneti: Itophiyu pireesete uurrinsha 82ki dirose amaddino; 82 dirrara qaaggo ikkanno gede 8 kumenna 100 maxaaffa aate mixi`noommonkanni. Ikkolla ikkinnina mixonke aleenni 10 kumenna 400 maxaaffa baraarsatenni xaphooma 15 kumenna 400 ale maxaaffa abrihootira uynota xawisino.
Kalaa Geetinneti xawishshi garinni; Itophiyu pireesete uurrinsha hanafotenni hanaffe midiyunna odeessaanchimmate loosi hanafaminowa ikkasenni midiyahonna komunikeeshiinete, odeesaanchimmate loosira luphiima kaa`lo baraarsitino uurrinshaati. Loonsannihu borrote looso ikkasinni haammata borreessaano fultanno gedeno doogo fantino; borri qaloteno baasa baraarsitino; xaphoomunni gobbaateno haammata looso loossino uurrinshaati yino.
Amaaru afoo lede afaan Oromo, Ingiliizanyunna woloota gobbanke afuubba lophora jawa kaa`lo assitino. Luphiima ikkitino footonna borro amaddinota ikkasenni xiinxallote, buuxotenna dhaggete noose qeechi luphiima ikkinota xawisino.
Abbebech Maatewoos
Bakkalcho Ella 9 , 2014 M.D
