Hawadi yannara gananno xeena harunsite qoqqowoho kalaqantara dandiitannota lolahu dano gargarate balaxote qixxaawo assinanni hee’noonnita Sidaamu qoqqowi gorsu latishshi ejense xawissu.
Ejense Qoqqowoho lolahu dano kalaqantanno yine xiinxallotenni bandoonni qooxeessubbara 43 Miliyoone birra gaamme lolahu dano kalaqantannokki gede dandiissanno pirojekte hananfoonnitano egensiissino.
Ejensennihu qaru loosu harisaanchi kalaa Yooseef Belayinehu baxxinohunni Bakkalcho Gaazeexira xawisino garinni; Sidaamu qoqqowira hawadi yannara gananno xeena harunsite lolahu dano kalaqantanno yine xiinxallotenni bandoonni qooxeessubba mereerinni Lokka Abbaayyu woradi mitto ikkanna, konni alba woradaho Mereera yinanni olliira luphiima dano kalaqante sa’inota kayisino.
Konninni harunsine tayixe hawadi yannara konni qooxeessira labbanno dano kalaqantannokki gede qoqqowu mootimma wodiidi waayi loossa Interpirayize ledo halamatenni 43 Miliyoone birra gaamte lolahu ragasi amade haranno diche loossanni afantannota kalaa Yooseefi uurrinshinkera xawisino.
Sidaami giddo calla ikkikkinni woluwinni dagganno waayibbanni doogga lolahunni wo’mitanno woyte dano iillitara dandiitannota huwachishinnohu ejensete sooreessi; baxxinohunni waayibbate qooxeessubbara mi’nite heedhanno daga qoropho assitanno gede duure huwachishanno.
Amadisiisatenni sa’u muli barrubba giddo gobboomu metroloojete ejense hawadi yannara baalante gobbate qooxeessubbara bikku aleenni ikkino xeeni hee’rara dandaanno yite mashalaqqe fushshitinota kayisinohu sooreessu; qoqqowu dagano tenne seekkite huwatte xeenu yannara jajjunna saadate aana dano iillitannokki gede lowo qoropho assitanno gede qaagiissino.
Baxxinohunni oosichinsa xeena gananna mininni fultannokki gede luphiima qorophonna agarooshshe assitanno gede, miteekkite rosu minira hadhannoha ikkiro xeena gananna fultannokki gedenna xeenu birra geeshsha xee’nite agartanno gede maate huwanyo kalaqa hasiissannonsata kaajjishe huwachishinno.
Qiddist Gezaheny
Bakkalcho Ella 9 , 2014 M.D
