–710 toone ale giwirinnu guma islanchimmasinna keeraanchimmasi buunxe gobbaydira sonkoonni
Addis Ababa:- Giwirinnu laalchuwa gobbaydi dikkuwara soyaatenni 2.2 biliyoone doolaare afi`noonnita Giwirinnu Ministere egensiissu.
Sai baajeettete dirinni honsu aganinni 710 kume 364 toone giwirinnu laalchuwa keeraanchimmanna isilanchimma buunxe gobbaydira sonkoonni.
Giwirinnu ministere ministirichi kalaa Umer Huseeni xawisino garinni; 2014 baajeettete dirinni honsu agani giddo giwirinnu laalchuwaha fulote laalchi dikkira lossate wo`naalsha assinanni keeshshinoonni.
Giwirinnu laalchi gummanni 2.2 biliyoone doolaare eo afi`noonnita xawisinohu ministirchu; eo sai dirihu ledo heewinsanni woyte 388 miliyoone doolaare lexxo leellishino yiino.
Giwirinnu laalchi ekispoorte xaphoomunni gobbate deerrinni gobbaydira sonke afi`noonnihunni 3.29 biliyoone doolaare eo xibbuunni 70% qeecha amadinotano ministirichu coyi`rino.
Giwirinnu ekispoortenni afi`noonni laalchuwa giddonni bunu umi darga amadannota xawisinohu kalaa Umeri; sai honsu agani giddo gobbaydi gobbuwara soyantino laalchuwanni xibbuunni 45% ikkannohu buna ikkanna xibbuunni 19% ikkannohu daraarchu laalchi luphiima qeecha amaddino gede xawisino.
Giwirinnu fulote daddali aana luphiima womaashshu shiqisho ruukkadimma no yiinohu ministirichu; aanne qarra tirate luphiima illacha uyne loonsanni yiino.
Ledoteno giwirinnu laalchuwa isilanchimma buuxate babbaxxitino loossa loosantanni noota kalaa Umeri coyi`rino. Giwirinnu laalchi ekispoorte lossate isilanchimma hasiissannota coyi`rinohu ministirichu; giwirinnu laalchuwa keeraanchimmanna isilanchimma buunxe gobbaydira soyate mixi`noonnihu 682 kume toone ikkirono mixote aleenni 710 kume 364 toone giwirinnu laalchi buuxo gumulatenni laalchuwate keeraanchimmanna isilanchimma buuxatenni gobbaydira soya dandiinoonnita tittirshunni xawisino.
Gobbaydira fultanno murote laalchuwara 12 kume ale keeraanchimmate buuxisaano sertefikeetubba aamantinota coyi`rino.
Gobbaydira shiqqanno saadate maali laalchuwa isilanchimma gorrote albaanninna gorrote gedensaanni buuxo assa dandiinoonnitano ministirichu egensiise; 1.8 miliyoone gorro saada aana gorrote albaanni buuxo assinoonnitanna 1.6 miliyoone saada aana gorrote gedensaanni buuxo assinoonnita kalaa Umeri xawisino.
Abbebech Maatewoos
Bakkalcho Ella 9 , 2014 M.D
