Addis Ababa:- Qoqqowoho xaa geeshsha 18 waraddara, 177 olluubbara kalaqantinota gidu da`muulla hunate budillite doogonninna kemikaaletenni gargadhate looso loonsanni hee`noonnita Sidaamu qoqqowi Irshunna kalaqamu jiro latishshi biiro egensiissu.
Biirote sooreessi kalaa Mesfin Qarre baxxinohunni Bakkalcho gaazeexi ledo bilbilunni assino keeshshonni xawisino garinni; qoqqowoho xaphoomunni xaa geeshsha 13 kume 701 hektaare ikkitanno baatto aana gidu da`muulla kalaqantinoha ikkanna konni giddonni 11 kume 786 hekitaare baatto aana gargadhate looso loonsoonnita xawisino.
Budillite doogonninna kemikaaletenni gargarranni hee`noonnita egensiisinohu biirote sooreessi; budillite doogonni 7 kume 679 hekitaare ikkitanno baatto aana gagadhate looso loonsoonni. Hattono 3651.5 liitire kemikaale horoonsi`ratenni 4 kume 106 hekitaare ikkitanno baatto aana gargadhate looso loonsoonni yiino.
Kalaa Mesfini xawishshi garinni; kuni da`muulchi kalaqamanno yannara budillitte doogonni darchunninna utta afidhino haqquwanni gane giggishshatenni hakko noowanni lekkatenni kakkande mirchiishatenninna bushshu giddo madaaratenni garghadha dandiinanni.
Tini da`muulla umihunni kalaqantannohu hayissote aana ikkasinni badalate irshi widira taraabbannokki gede assate shiima bale umatenni mirchiishe shaanna madaara hasiissannotano coyi`rino.
Amadisiiseno, tayxe madaabbaru waagi lexxonna dooramino sirchi anje no yinohu kalaa Mesfin Qarrehu; sae sae gananno xeeni irshu giddo gatanno gede assate looso babbaxxitino waraddara kaajjinshe sunfoonnitano xawisino.
Abbebech Maatewoos
Bakkalcho Ella 9 , 2014 M.D
