Addis Ababa:- Hasi’noommo guma afi’rate mittu mittunku hedote, yannatenna baychu aana noonke laooshshe taashsha hasiissannonke yiino Xaphoomu ministrchi Dr Abiy Ahimed.
Xaphoomu ministrchi Dr Abiy dagate riqiwamaano amaale mine 13ki uurrinshu songo aana shiqe miillatenni shiqqinosi xa’mora xawishsha uyno.
Tenne yannara gobbate gede hasi’neemmo guma abbate mittu mittunku qansichi hedote, yannatenna baychu aana noosi laooshshe woyyeessa hasiissannosi yaanni sokka saysino.
Hedote buxima daga shashshaffanno yiinohu Xaphoomu ministrchi; hedo gatamarateno ikko diigate dhuka afidhino; faradu surre gobba gatamartara didandiitanno. Garunni loosantino surreeti gobba uurrissannoti yino.
Hedo manna gatamartanno; mannu qole uurrinsha; uurrinshano qolte gobba gatamartanno. Hedo sirchoho; mannu haqqete; uurrinsha dubboho; gobbano qolte dubbu gambooshsheeti. Baalunkurira kaimu hedote yine xinta huwanteemmoha ikkiro ninke kayinni sircho baana assineemmore ikka dinonke. Sircho billaallinsummokkinni dubbo buujjineemmokkire ikkinummoro gobba didiingeemmo yaanni coyi’rino.
Xaphoomu ministrchi xawishshi garinni; hedotenni aleenni sufotenni illachisha hasiissannohu yannate aanaati. Konnira, mittu mittunku manchi yanna horonsi’nanni garanna mayimma shotunni huwata hasiissannosi.
Yanna aamantinonke muxxe jirooti yiinohu xaphoomu ministrchi; aamantanno ikkinnina dihidhinanni. ‘’Aamantino yanna huwante tirfira dandaa hoongiro gedensi gaabbote’’ yiino.
Konni daafira noonke yanna garunni horoonsi’rate aana illacha tuga hasiissanno. Hawadi arro dikkanno; tunsichuno xawaabba dikkanno. Kalaqamu ikkito ikkitinohura noonke yannanni loonse horoonsi’ra hasiissanno.
Kuni ikka hoogiro yannano anna afidhinona ga’a iillanno yine agurrummoro guma diafi’neemmo yaanni coyi’rino.
Wole widoonni mannu yannanniha calla ikkikkinni baychu usuramaanchooti yiinohu Xaphoomu ministrchi; mannu bikkamino baychooti loosa dandaannohu. Konni daafira hawado loosi’noommo baatto arro agurrummoro umonke horonsiraano assa didandiineemmo. Konnira noonke laooshshe sorra hasiissannonke yiino.
Xaphoomu ministrchi; baychu daafira noonke huwanyo ajjinota ikkasenni kaa’la dandiitanno gobba huucci’raancho assinoommo. Baatto loonsiro ayirrissanno; hasaawunni qarru ikkinnina gumu didaanno yaanno laooshshe kaajjisha hasiissannonke yiino.
Qiddist Gezaheny
Bakkalcho Ella 9 , 2014 M.D
