Addisu Adoola
Hawaasa:-Xeena calla agadhite dirunni Mitte higge latisidhanno daga soorro abbitannokki daafira,Qoqqowi giddo Gorsu latishshira noo injo garunni horonsi’ra hasiissannota Sidaamu Qoqqowi Gorsu Ejense Qaru Loosu Harisaanchi Kalaa Yooseef Belaynehu huwachishi.
Kalaa Yooseefi Itophiyu Pireesete Uurrinsha ledo noosi keeshshonni xawisino garinni, Sidaamu Qoqqowira hala’lado Gorsunni lattara dandiitanno baattonna waay noo gede xiinxallotenni badate dandiinoonni.
Konni kaiminnino qoqqowu deerrinni jajjabba Gorsu latishshi pirojektubba loonsanni afammannita coyi’rinohu qaru loosu harisaanchi; kuri mereerinnino Lemiina Honse /29/ pirojekte gumulante dagate owaante uytanni afantannoha ikkanna, Lemiina Mitte/28/ ijaarshu aananna Settayna Sette/88/ qole xiinxallotenna dizaynete loosi goofeenna ananno baajeettete dirinni ijaarsha hanafate ejense millissanni noota xawino.
Xeena calla agadhite dirunni Mitte higge latisidhanno daga soorro diabbitanno yiinohu sooreessu; Gorsu latishsha halashsha yekkeerote shiqqannokki hajaati yiino. Saeno, gobbate gede gobbanke sagaletenni umose dandaate assitanno sharrora Gorsu latishshi handaari noosi qeechi hala’lado ikkinota coyi’rino.
Konni kaiminnino federaaleteno ikko qoqqowu mootimma Gorsu latishshi handaarira jawa illacha tugge millissanni afantanno. Ninkeno ejensenke gede ejensete tungoonni illachi garinni gobbate gede assinanni hee’noonni sharrora qeechanke fulate jawaante loonsanni hee’noommono yiino.
Pirojektubba hasi’noonni jawaantenni harate widoonni laanfe leeltanno gedeno kaysinohu Kalaa Yooseef; konnirano korkaati dikkote gea hooganna kontiraakiterootunniti ikkadimmate anje qara ikkitinota xawise; ikkollana, gobbate gedeno ikko qoqqowinke gede Gorsu Ejensera uynoonni illachi kaiminni qarrubba tayinse hasi’noonni gumulora iillate kaajjine loonsanni hee’noommo yiino.
Jeefoteno sokkasinni, Gorsu latishshi loosi gobbateno ikko dagankera noosita hala’lado horo huwatatenni baalunku qeechasi fulara sokkasi saysino.
Bakkalcho Ella 2/2014
