Qiddist Gezaheny
Hawaasa:- Quchumaho gumulantanno pirojektuwa giddonni meento beeqqisiisatenni horoonsi’raanchimmansa lossate loosanni afamannota Hawaasi quchumi gashshooti latishshunna konistiraakshiinete biddishshi egensiisi.
Biddishshunnihu laynki sooreessi kalaa Taariku Taammenehu Itophiyu Pireesete Uurrinshara xawisino garinni; konistiraakshiinete handaarinni meento beeqqisiisatenni horoonsi’raanchimmansa lossate loonsanni hee’noonni. UIIDP ni massagantanno seesallichu kinchi loosu pirojekitenni hala’lado kiiro noonsa wedelli beeqqanno. Loosunni meentu xibbuunni 50% labballunni taalo heewisamanno gede assatenni horoons’iraano ikkanni afamannota xawisino.
Heewisante qeeltanno maamarranni haammata kiiro noonsa meenti beeqqaanonna horoonsi’raano ikkanno gede assa dandiinoonnita sooreessu egensiisino. Woloota pirojekituwannino irko assatenni addi addi ga’rafo fultanno woyte balaxo meentoho aatenni roorenkanni horoonsi’raano ikkanno gede hala’lado looso loonsanni hee’noonnita qummi assino.
Batinye lawishsha ikkitanno maamarra nootanna baxxinohunni seesallichu kinchi doogo loosinna sheeddate giddo e’e owaantetenna daddalu handaari giddo bobbakkino maamarra umonsa ikkadda assate widoonni luphiima deerra iillitinotano sooreessu xawisino.
Amandoonni baajeettete dirinni seesallichu kinchi doogga loosinni 200 kumi ali wedelli kaayyote horoonsi’raano ikkansa xawise; kuri giddonni xibbuunni 50% ale ikkannori meento ikkansa qummi assino.
Meentu beeqqaano ikkansanni gobbaanni meyaa injinerootanna Formaanoota noonsa maamarrara balaxo uynannitanna massagaanchimmate qeechansa tenne pirojektenni fultanni afantannota kulino.
Meentu konistiraakishiinete handaarinni beeqqaanonna horoonsi’raano ikkanno gede assate gobbaanni qoossonsa horonsirannonna ikkadda assate loonsanni hee’noonnita sooreessu lede coyi’rino. UIIDPni gaammanninsa baajeettenni addi addi qajeelshuwa uminsa qixxeesse uminsa aanno gede assinanni hee’noonnitano egensiisino.
‘CIP’ mixo aana meentu callinsanni hasaawanno gede, muranno gede, hiittenne pirojekituwarano balaxo aa hasiissannonsatanna pirojekite gooffanno woyte mageeshshi meenti horoonsi’raano ikkannoronna beeqqaano ikka hasiissannonsaro biddishshu widoonni hala’lado looso loonsanni hee’noonnita sooreessu xawisino.
Aanteteno meentu qoossonsa afe dhuka kalaqi’ranno gede lawanno looso loonsannitanna heewisamaano ikke sufanno gede injoo kalaqate loonsanni hee’noonnita coyi’rino.
Bakkalcho Ella 2/2014
