Amsaalu Felleqe
Addis Ababa:- Hawadi yannara luphiima xeena gananno qooxeessuwara heedhannori loosidhe galtanno daga lolahunni gawajjantannokki gede balaxxe lolahu du’namammo booe qixxeessanna qoropho assa hasiissannota Giwirinnu Ministere huwachishshino.
Ministere Biheeraawe Metirolooje inistituutenni fultanno himano loosidhe galtinorira iillishshanni afantannotano egensiissino.
Instituutennihu diilallote akatinna himani ogeessi Taammiru Kabbadihu xawisino garinni; Laaliina yaamamannohu diilallote akati iillishino diilallote soorro korkaatinni badheessunna goyirete yannara xeenu ganikkinni sa’ino aganna ikkansa kulino.
Hawadi yannarano baxxinohunni Maajunna Woxawaajje agannara hasiisannohu aleenni ikkino xeeni ganara dandaannota himanu noota qummi asse; konninnino loosidhe galtinori gati gawajjamannokki gede kawaanni balaxote qoropho assa hasiissanno yiino.
Giwirinnu ministere gidu latishshi dayrekiterichi Isaayyaas Lammihuno isi widoonni; daannohu hawadi yannara hee’ranno xeeni mite mite qooxeessuwara lolahunninna bushshu hoshooshammenni dano kalaqantara dandiitannota qummeessino.
Tenne yannarano woyyaawu gidu laalchi hee’rannota xawisinohu kalaa Isaayyaas; loosidhe galtinori gatensa garunni shuqunate looso kaajjishshe sufa noonsata huwachishino.
Gide laashshinanni gati gobbaanni loonsannihu bushshunna wayillasote agarooshshi loossa; lolahu du’namanno booe qixxeessa lede labbannota gargarooshshu hayyo baala horoonsi’ra hasiissanno yiino.
Loosidhe galtinori badheessu yanna goofimarchira gananno xeena hawadi yannara loonsoonni gatira horoonsi’ra hasiissannotanna tini yanna gide winxannita ikkasenni qixxeessinoonni gate wixunni diwate looso kaajjinshe loosa hasiissannotano huwachishino.
Bakkalcho Ella 2/2014
