Amsaalu Felleqe
Addis Ababa:- Qoqqowu dagoomira hasiissanno owaante aatenni latishshanna dancha gashshoote halashshate illachinshe loonsanni hee’noonnita Sidaamu qoqqowi mootimma dagoomitte hajubba amaalaanchinna pirezidaantichu addi amaalaanchi kalaa Tasammi Diimihu egensiisi.
Kalaa Tasammi Itophiyu pireesete uurrinsha ledo bilbilunni assino keeshshonni xawisino garinni; baincho assoote sharramatenni, dagoomu hasi’ranno owaante garunni uynanni latishshanna dancha gashshoote halashshate illachinshe loonsanni hee’noonni.
Baincho assoote sharramme dancha gashshoote halashshate ragaanni qoqqowu mootimma kaajjado uurrinsha amadde loossanni afantanno yiinohu kala Tasammi; sa’u muli yanna giddono qoqqowoho deerru deerrunkuni noo loosu sooreeyyeranna massagaanora dhuka dhaabbachishate qajeelsha uynoonnita xawisino.
“Xaa geeshsha la’noonni garinnino mite mite mootimmate loosu massagaanonna ogeeyyete widoonni xe’ne noota bandoonni. Uynoonni qajeelshinnino albinni roore dagooma owaatanna dancha gashshootenna latishsha halashsha dandiinanni garinni huwanyoote kalaqa dandiinoonni” yaanni xawisino.
Quchumahono ikko baadiyyete dagoomu hasi’rannohu rakkino owaante, latishshanna keere ikkasinni; hiikko deerrirano afantannori mootimmate loosu massagaanono ikkito ogeeyye balaxxe owaattanno daga ayirrisa, hasattonsata seekkite afanna loosu budi hee’ransara hasiisanno yiino Amaalaanchu.
Loosu massagaano widoonni leeltanno xe’ne taashshate paarteno ikkito mootimma yanna yannantenni keenonna harunso assatenni sokkonsanna yawonsa garunni fultannokkirenna daga koffi assitannori aana hasiissanno qaafo adhatenninna xa’mamaanchimma diriirsatenni woloottahono rosicho ikkanno garinni taashshote qaafo adhinannitano huwachishino.
Xaa yannara hiittenneno mootimmate loosu minnara loosu yannara assinanni gambooshshi dino nookkitanna loosaasinete gambooshshe loosu yanna gobbaanni hattono kaawinete gambooshsheno Qidaamete barra loosu yanna gobbaanni owaatamaano batidhannokki yannara harinsannita xawisino.
Muishshanna mooraanchimma gargarate ragaannino tseremussinnunna shallagote qorqorshi widoonni assinanni harunsonna qorqorshinni kaajje sufinota coyi’rinohu kalaa Tasammi; togoo assooti giddo angansa wortino sooreeyyeno ikkito ogeeyye aana taashshote qaafo adhinanni xa’mamaanchimma heedhanno gede assate ragaannino qoqqowoho kaajjinshe loonsanni hee’noonnita qummeessino.
Deerru deerrunkunni daga kayissanno xa’muwara qoqqowu mootimma dawaro qolate hixamanyite loossanni afantanno yiinohu kalaa Tasammi; gobbate soorro daggara albaanni loonsoonnikki latishshanno qoqqowu tantano adda assini kawa sa’u lame dirra giddo woyyaawino garinni loosa dandiinoonnita kule; albillichono dagooma duuchu handaarinni beeqqaanonna horaameeyye assate illachinshe loonsanni hee’noonnita xawisino.
Bakkalcho Ella 2/2014
