Qiddist Gezaheny
Hawaasa:– Gobbankera daggino soorro sufo nootanna jawaata ikkitanno gede meentu qeechi luphiima ikkinota mite mite Sidaamu qoqqowi luphiima loosu massagaano coyidhino.
Sooreeyye tenne coyidhinohu Hawaasi quchumira harinsoonni quchumu latishshi Konisitiraakishiinete biddishshi Sidaamu qoqqowi pirezidaante borro mininni hattono quchumu latishshi Konisitiraakishiinete ministeree ledo halamatenni qixxeessitino meentu horonsi’raanchimma illachishshino bare aanaati.
Sidaamu qoqqowi Jireenyu paarte borro mini sooreessi kalaa Abirihaam Marshaallohu coyi’ranni; meentu miinju dagoomittetenna poletiku handaarranni beeqqaano ikke yawonsa garunni fulanno gede irkisatenni gobbate Jireenyi ollohannoha assa hasiissannota huwachishinno.
Sooreessu amadisiise; gobbate Jireenya wo’munku handaarinni buuxisiisatenna rahinoha assate meento miinjunninna dagoomittetenni beeqqaanonna jawaattinore assa hasiissanno yiino.
Konnirano, mootimma daga kakkaayisatenni gobba miinjunna addi addi latishshu handaarranni rakkino lopho borreessiissanno gede wole yannanni aleenni jawaatte loossanni afantannota kule; baxxino garinni wodhonna Istiraateeje kalanqe loonsanni hee’noonnita egensiisino
Qoqqowu deerrinni dagate kiiro boco anga amaddannori meento ikkansanni; meentu horonna beeqqo lossate loonsanni hee’noonniha ikkirono; xaano gatannori haammaturi noota coyi’rinohu kalaa Abrihaami; Tekinoloojete shiqishonninna daddalunni hattono addi addi qajeelshinni dandoonsanna dhukansa bowirsi’ranno injoo kalaqa hasiissannota lede huwachishinno.
Hawaasi quchumi gashshooti kantiiwi kaa’laanchu pirofeesere Tsegaye Tukehu isi widoonni; quchumaho harinsanni mitte mittente latishshu millimmo giddo meentu beeqqo luphiima ikkase kayse, meento miinjunna dagoomittete hajubba aana beeqqisiinse yawonsa fulanno gede kaayyo aa hasiissannota coyi’rino.
Bakkalcho Ella 2/2014
