Addis Abeba:- Mannihimmitte kaa’looshshi loosira Tigraye 2.1 Biliyoone birra sonkoonnitanna 87 kume Metrik Toone sagale hattono 783 kume Litre ali nadaaje sonkoonnita xaphoomu ministrchi borro mini egensiisi.
Xaphoomu ministrchi borro mini Pirees Sekretariyaatete borro mini sooreette Billene Siyyumiti yannate hajubba aana odeessaanote xawishsha uytino. Aliyye gobbate kifilera Ammajje agani 2013 M.D nni hananfe Onkoleessa 26 2014 M.D geeshsha noo mashalaqqenni mannihimitte kaa’looshshira 2.1 Biliyoone birra sonkoonnitanna 87 kume Metik Toone sagale Tigraye sonkoonnita Billene Siyyumiti egensiissino.
Wole widoonni 217 kumi kg ali xagichu shiqisho Tigraye iillitanno gede assinoonnitanna sagalenniha ikkinokki mannihimitte kaa’looshshe baxxinohunni fooliishshi’nanni base e’’o lainohunni 130 kume kg ikkitannota mannihimitte ikro Tigraye sonkoonnita coyidhino.
Dotteessunna Onkoleessu agannara mannihimitte kaa’looshshe hogobbinori 1 kumi 306 kaameella Tigraye e’’ansa qummi assite; ledoteno mannihimitte kaa’looshshe iillishshannore ayyerete buuwattono assinoonnita xawissino.
Nadaaje lainohunni 783 kume litre ali Nadaaje Maaja agani 2013 M.D kayinse Onkoleessa 26 2014 M.D geeshsha noo yanna giddo Tigirayete qoqqowo sonkoonni yitinno. Mootimma bikkantinokkita mannihimitte irko assitanno gede murri yannanni kayinse babbaxxitino irko assinanni gede hasiissanno kaa’lo assitanni afantanno yitinnoti Pires Sekretariyaatete sooreette; mootimma mannihimitte kaa’looshshira noose murciraanchimma leellishshino yannara kayinni baxxinohunni sa’u Shoole lamala giddo HWHT gaamo ledote ganora qixxaabbanni afantannota qummi assitinno.
Tini gano albaanni noota gibrinnu yanna hedote giddo wortinota ikkase dadillisanno coye ikkasi xawisse; cancishaano HWHT sa’u yannara assitunte gede ola suffuha ikkiro Tigirayete qoqqowi daga kisaarahonna qoqqowu Gibrinnu loosi aana xiiwo kalaqannoha ikkanno yitanni qarru akkimalimma huwachishshanno. HWHT Tigirayete daga wolqatenni gaamote giddora karsatenna olaho dirate sharro assitanni afantannota babbaxxitino mashalaqquwa leellishshanno.
Hattono Itophiyu mootimma keereho noose murciraanchimma leellishshino. Ledoteno qoqqowoho mannihimitte kaa’looshshi iillanno gede sharro assitanni no. konni garinni wolootu bissa Tigraye e’’annohu mannihimitte kaa’looshshi mageeshsha hasi’noonni illachira hosanni nooronna qansootaho suwashshimmatenni iillanni nooro buuxa hasiissannonsa yitinno sooreette.
Tigirayete qoqqowinni ledote Affaarete qoqqowira 19 kume Metrik Toone sagalete irko hasiissannonsa qansootira shiqqinota xawissinoti Billene; Amaaru qoqqowira kiphote ledo amadaminohunni kalaqantino dartenni qarraho aamantino qansootira 244 kume Metrik Toone ali sagale babbaxxitino dagoomu bissara iillinshoonnita egensiissino.
Moolletenni gawajjantino qansootira assinoonni irkonni mootimma hasiisannoha mannihimitte k a a ’ l o o s h s h e shiqishshinota coyidhe; Itophiyu danote yaaddo loosu massago komishiinenni afi’noonni mashalaqqe garinni; Maaja agani 2013 M.D nni kayise Onkoleessa 2014 M.D geeshsha kalaqamu dano korkaatinni gawajjantino 3.2 Miliyoone qansootira sagalete kaa’looshshe assinoonnita qummi assitinno.
Irko afidhino qansooti roore anga Oromiyu, Somaaletenna Wodiidi qoqqowubbara afantannore ikkansa xawissino. Wole widoonni mootimma babbaxxitino qoqqowubbara adhitanno seera agarsiisate qaafonni keeraano qansooti aana gawajjo iillitannokki gede qoropho assitanno yitino.
Qiddist Gezaheny
Bakkalcho Ella 2/2014
