-Itophiyu polise gereewo hiyyeeyyetenni agarate 24 saate loossanno wolqaati.
Abbebech Maatewoos
Addis Ababa:- Federaalete polise dhuka, dandoonna tantano hattono qodho yannoonsatenni Itophiyu ledo taalinohanna ragu ragunku xaaddanno jiffara ikkado dawaro aate dandiitannota polisete olanto uurrinsanni hee`noommo yaanni Xaphoomu ministirchi Dr Abiy Ahimed coyi`ri.
Sai Sambatu barra qixxeessinoonni polisete uurrinshuwa galatatenna afansha aate amanyooti aana leelle hasaawa assinohu Xaphoomu ministirchi Abiy Ahimed /Dr/; polisete uurrinshuwa uurrinsannihu Itophiya diiggara hasidhanno wolquwanni Itophiya woxxateeti yiino.
Ledoteno 120 miliyoone dagara baca polisete wolqa, yannaasincho olu uduunninna kaajjado uurrinsha hasiissanno yiinohu Xaphoomu ministirchi; polisenna uurrinshuwa kaajjishate loosi kaajje sufannoha ikkasi coyi`rino.
Polisete uurrinshuwa aana assinanni hee`noonni rifoorme qixxaabbino istiraateejubba aana worroonnire ikkansa buuxisinohu Xaphoomu ministirchi Dr Abiy; soorrote hedo annuwu loossinoha dancha looso sufisiisatenni ishine buqqise fushshatenni, Itophiya labbannonna Itophiya owaattannota polisete wolqa uurrisa ikkinota xawisino.
Haaro polisete uurrinshuwa rifoormenni qixxeessinoonni istiraateejenni dagoomu giddo ammanantinota, macciishshantannonna hattono ayirrinsannita ga`labbote wolqa ikkite tantanantanno gede assa mitto illacha ikkasinna konnirano babbaxxitino loossa gumulantanni nootanna yannate ledo lophanninna dana soorri’ranni daannoha jaddote akata gargadhatenni ikkado uurrinsha ikkitanno gede assa wole rifoormete biso ikkitinota huwachishino.
Ledoteno, keere gibbanno wolquwata millimillo luphiima loosu gumulshinni qeelara dandaanno uurrinsha uurrinsanni yiinohu Xaphoomu ministirchi; harunsineemmohu Federaalete amanyooti ledo mitteenni qoqqowubbatenna addi addi ga`labbote uurrinshuwa ledo qinaawotenninna halamatenni loonsanni polisete uurrinsha kaajjishate mixo amandoonnitanna konni garinni loosamanni noota buuxisiisino.
Federaalete polise baalanti keerunna ga`labbote uurrinshuwa kaajjite suffanno gede hasiisannohu Itophiyu Jireenyira keeru xinta ikkinohura qara keeru agaraancho ikkitinota polisete uurrinsha kaajjisha keeraanchimmateno ikko latishshaho hasiissannota coyi`rino.
Polise lubbote kakkalama geeshsha baattanno waaginni dagate keeraanchimma agarante heedhannota kaysinohu Xaphoomu ministirchi Dr Abiy; ikkollana aja damooza baantanninsa daga mereero polise mitte ikkitinota kaysatenni Itophiyu lowo geeshsha owaattannose polisootira ikkado baatooshshe baata nafa hoogguro ayirrisa rosiisi`ra noose yee huwachishino. Polise mootimmate widoonni calla ikkikkinni dagatewiinnino ikkado ayirrinye afidhara hasiisannonstanna polisetenni dunneessantino jadduwa ikkikkinni polisete illenni wirri yitino jadduwa seekkite la’’ate budi gatanno gede Xaphoomu ministirchi seejjino.
Sanna baalate, agannatenna barru baala polise ninkera kullannikki jadduwa dunneessitanno yiinohu Xaphoomu ministirchi; kayinnilla, dunneessitinota, daafuraabbinotanna waaga baattinota ikkikkinni sae sae polisete illenni wirri yee bainoha batinse coyi`neemmo. Ga`labbonkenna keerenke buuxisiisate kakkalantanna ayirrinsoommokki polisoota jaddo iillinshanninke woyte qubbichonke kaynsammonsaranna abbooshshi’nammonsara dihasiisanno yiino.
Xaphoomu ministirchi xawishshi garinni; Itophiyu polise gereewo hiyyeeyyetenni agarate 24 saate loossanno wolqaati. Baca yanna kayinni gereewo agarranni woyte hiyyeeyye hagiirsiissanno doogo diheedhanno. Konni korkaatinni haammata hiyyeeyye raartanna macciishshinanni. Raarenniti tiro Gereewo hasi`nummo gede inteemmo gede agurrenke yitannote.
Polisootu Gereewo gatisa calla ikkikkinni hiyyeeyyetewiinni galata afi`nannikkita affine iillachunni loosatenni Itophiyu qansoota Hiyyeeyyetewiinni gatisate looso`ne kaajjishshine suffinanni gede huwachisheemmo`ne yiino.
Xaphoomu ministirchi Dr Abiy; xaa geeshsha noo opireeshiinenni madidhinorira, daafutinoriranna waaga baattinori polisete miillara mootimmanna daga halante mada`ne xagisatenna daafuro`ne beeqqate looso kaajjishshe suffanno yee; ba`lattotenna addi addi baraarshuwano kaajjite suffannota coyi`rino.
Barrahono Itophiyaho harinsoonni seera agarsiisate, tiiunna daganna dagoomu mittimmate gaado hattono woloota polisete loossanni gaamotenninna hallanyunni qeelle assitinonna luphiima loosu guma borreessiissino polisete miilla baraassinoonninsaha galatunna afamishshu baraarsha Xaphoomu ministirchi Abiy Ahimedihu anganni adhitino.
Bakkalcho Ella 2/2014
