(Gafa 1)
Meine yaamameemma, kalaqami`yanni sammiimate. Mine maate, rosu mine jaalla`ya hattono doogote coyi`re coyshshiishanno baali ane coyshiishate wo`naaliro dawaro saalaholla. Coyinke aana sammi yaa rosiissinoeti ahaahe`yaati; Isewa lophoomma.
“Beetto`ya coyishshiishi baalira tumo qola egenno keensiissanno, sammi yaa roorsi’ri, mite yannara sammi yaano dawarotena” yitannoe. Ahaahe`ya amaalteenna asseemmakkiri hee’riro, assa hooga callate. Su`mano Meine yitinoeti iseeti; anni`ya missiri yee woshshannoe. Rosu mini`ya su`mino Missiriiti.
Baadiyyete noonke jironni qooce, anni`ya quchumaho mine mininonke. Wolu seennu roduuwi noonkekkihura ane hakkira sonkiekkinni digantanni yitanno hedo nooe;Gogunni giwisi’roomma. Massinierono wole heeshsho roseemmaha dilawinoe. Afoommakki afiinni, egennamoommakki jaallanni egenname hee`ra wirro ilamate ledo taaloho.
Hakkunni aanano Qanxaa`le cince diafeemma. Woowwoy hada dikuloomma`ne, Qanxaa`le ahaahe`yaati. Anni`ya aananno diri roso quchumaho ha`re roseemmata kulinoe. Shubbaare yaaddo shitanni no. Shubbaare ledo rosu mine assineemmokkiri dino. Hee’re egenninonkekki jaalira baxillu sokka ninke ninkewa borreessa rosiisira goofote. Hakkuyinni aanne roore yanna fooliishshono fula agurre nabbambeemmo. Korkaatuno, daanno diro 8ki kifile fonqolo adhineemmohuraati.
Aananno diri rosira qixxaawo hasiissannohura anni`ya Sanyote barra quchuma haa’re massaeraati. Maaxe wi`la hanafoomma. Quchumaho horonsi`nanni afoo egenna hooga`ya wole yaaddo`yaati.
Anni`yara dee`ni yaa didandiinanni, hanqiro noowa diafanno. Doobbiichu gede ittane, angasira bagaduno hee’riro aratatella. Coynke aana godowa shooshaqahona afoolla hanqanno. Ga`a harammaraati, techo Shubbaare ledo xaadoomma, keerunni yaammasira.
Hay Shubbaare, hindiiddo kutta tugganni daggino. Hada anni`ya balaxe woshshe kulinose. Aneno amaaltara maganye yee soynose. Alba`yaanni dagge, daaddanno hindiido shaashesenni fiidhe, muushshi yitino. Daggue, daanno diro anino dayemma yitue. Coyi`nire baala adda assi’reemmahura ammanese shiimare shesho afi’rumma.
‘’Quchumaho coyi`nanni afoo rosiisohe’’ yitue haa’riintanni, iseno diegentinowe, ane sheshifachishateeti. “Woddishaallewu” yaa baxeemmahe yaate. “Debiter sixi’’ yaa maxaafa uyie yaate. Wolereno yituella.
Baxxinammora ka`nummota, ‘’kuleemmaheri no’’ yitue Shubbaare. Ih, ih, ih, yite hindiiddo kutta gantu. Makkiteetilla dikulattae yaanni Shubbaare wodana hunanni noomma. Tenne daddaabbe Iyyoosaafixira haadhe harie yite 16 qooli dafitarinni luqqinsoonni xuruuraame luukera borreessinoonni borro uytue.
Gafa lame suffanno…
Abbebech Maatewoos
Bakkalcho Onkoleessa 25, 2014 M.D
