Addis Ababa:- Itophiyaho gorsu latishshi looso 400 kumira noowiinni 1 miliyoone hekitaare widoogge lossate loonsanni hee`noonnita gorsunna gammoojjittete qooxeessi ministere egensiissu.
Giwirinnu ministerera gorsu latishshi gobboomu qineessaanchi Dr. Daanieel Mu’latihu xawisino garinni; sai dirira gorsunni 400 kume hekitaare aana latino. Konne wo`naalsha adhatennino gorsu latishshi looso 1 miliyoone hekitaarera lossate loonsanni hee`noonni.
Gobbate gede gorsu piroojekituwa haammachishate mixi`noonnita xawisinohu Dr Daanieeli; gorsu latishshi looso 400 kuminni 1 hekitaare baatto widoogge lossatenni ledoteno onte qoqqowubbara calla (Amaaraho, Oromiyaho, Affaarete, Wodiidonna Sidaama) loosamanni keeshshinoha gorsu latishshi piroojekitete looso wolootta qoqqowubbarano halashshatenna iillishate mitteenni amadisiinse loonsanni hee`noonnita
Qamadete gorsu latishshi piroojekite loosi aanteteno kaajje suffannoha ikkasi kulinohu Dr.Daanieeli; piroojekitete loosi soorro leellishinoha ikkasinni baalante qoqqowubbaranna wolootu gidi aanano piroojekitete loosi kaajje sufannota buuxisiisino.
Dr.Daanieeli xawishshinni; gobboomu deerrinni onte qoqqowubbara hanafaminoha gorsu latishshi looso aantete wole qoqqowubbara halashshate harinshora mixi`noonnita xawise; harinshotenni daanno diro Somaalete qoqqowo lede mereerimunni Gaambeellahonna Benishaangulete hattono wodiidi galchimi Itophiyinna woloota qooxeessubbara halashshatenni laalchimma lossate kaa`lanno looso loonsanni hee`noonni.
Piroojekite laalchonna laalchimma lossatenninna gobbanniha giwirinnu laalcho horonsha luphi assatenni gobbate giddohunni giwirinni laalchinni diwate widoonni noosi kaa`looshshi ledo amadisiisameno baalante qoqqowubbara loosate mixotenni amandoonnita coyi`rino. Gorsu latishsha halashshate gobbate gede looso loonsanni hee`noonni yino.
Arri gorsinninna hawadi yannara qamade latisatenni Itophiyunni sa“e olluu gobbuwaha qamadete laalchi anje tirate qinaawotenni loosamanni noota Dr xawisino.
Ledotenni arru gorsanna hawado qamade hala`lishshunni latisatenni gobbayidi miico gargadhatenni Itophiyu bayirroonye sufisiisatenna sagalete woowe buuxisiisateno jawu qeechi noosihura loosu hala`lishshunni kaajje sufanno yino.
Gorsu latishshinni horaameeyye ikkitinorinna aantete ikkitannori baatto loosidhe galtinori badala, seliize, bashanqa, akaakiltenna gumma latisatenni diru giddo lamenna sasa higge laalcho laashsha dandiisannonsaha ikkannota xawisino.
Abbebech Maatewoos
Bakkalcho Onkoleessa 25, 2014 M.D
