Addis Ababa:- Qoqqowoho babbaxxitino qooxeessubbara duucha yannara iillitannoti tiraafiikete dano bidhachishshinonsata mitu mitu qoqqowu teesaano koffeenyansa xawissu. Doogote ranke ajishannorenna addi addi malaatta worranni gedeno xa’midhino.
Dagoomu koffeenya kaima assine bilbilunni xa’mo kaynsoommohu qoqqowu Hodhishshunna doogote latishshi biiro Doogote tiraafike hobbaati dayrekiterichi kalaa Worqineh Agenyohu dawaranni; tiraafikete dano ajishate konni albaannino hala’ladda loossa loonsanni keeshshinoonniha ikkanna; tayxe dirinnino qoqqowoho 30 woraddaranna 6 quchummara dano gargadhate millimillote bare harinsoonni yiino.
Dano lainohunni dagoomu kaysanno koffeeenyinna bidhatto garaho yiinohu dayrekterichu; Tiraafikete danonni mannunna jajju aana iillitanno gawajjo batidhanno gede jawu korkaati jilbu aleenni ikkino garinni oofa; dooggate qaccuwara kalqoomu tiraafiikete malaatta hasiisanno garinni qasa hooga, doogote ranke ajishannore loosa hooganna lekkaasinu tayisse sa’annowa waajjo kuula hasiisanno garinni buura hooga ikkitinota qummeessino.
Iillitanno dano ajishate dandiissiisannore baxxinohunnino qara qara doogga aana doogote ranke ajinshannore loossannoti qoqqowu mootimma ikkitukkinni Federaalete mootimmanni loonsanniha ikkasinninna xaa geeshshano kuni malaati loosama hoogasinni mannunna jajju aana dano iillitanni noota xawise; iillitanni noo dano roorenkanni lamu goommi xexxerrisinni ikkinotano kulino.
Ikkollana, tiraafikete dano gargaratenni mannunna jajju aana iillitanno gawajjo gargarate qoqqowu deerrinni loonsoonni loossanni woyyaambe leeltinota xawisinohu dayrekiterichu kalaa Worqineh; konni dirinni mixi’ne loonsoonni loossanni sa’u honse aganna loossa keeno assini yannara tiraafikete dano sai dirinni labbanno yannanni ledo heewinsiro xibbuunni 11.6% dano ajjinota keennoonni yiino.
Qoqqowu deerrinni assinoonni keenonni dano ajjanni dagginota buunxirono xaa yannara dooggate loosi hala’lanninna gongo’mishamaanote injiitinota ikkiturono qarunni jilbu aleenni oofatenni iillitanno dano hee’rase dagooma bidhachishshannota ikkasenni konne qarra sufino garinni tirateno qoqqowu mootimma Federaalete mootimmanni ledo halante dooggate ranke ajishshanno malaatta loosantanno gede assinannitano lede qummeessino.
Amsaalu Felleqe
Bakkalcho Onkoleessa 25, 2014 M.D
