Sidaamunna Oromote daga kiphisiisate sharrama daafuroho ikkiro ikkinnina, ditolannonsa yaanni Sidaamu Qoqqowi Keerunna Ga’labbote Biiro Sooreessi kalaa Alamaayyo Ximootiwoosihu egensiisi.
Sidaamunna Oromiyu Qoqqowi dannunni xaaddanno qarqarubbara sa’e sa’e kalaqantanno gaance hegeraamo ikkino garinni tirate lamente roduuwu daga, gobbate geerrinna hajo la’annonsa bissa ledo amaalammete bare Hawaasi quchumira harinsoonni.
Battalate aana Sidaamu Qoqqowi Keerunna Ga’labbote Biiro Sooreessi Kalaa Alemaayyehu Ximootiwoosihu, Oromiyu Qoqqowi Keerunna Ga’labbote Biiro Layinki Soreessi Kalaa Hayle Gurmeessihu, Galchimi Arsi Zoone Gashshaanchi Kalaa Ahimedi Haajihu, lamunku qoqqowi jajjabba loosu sooreeyye, dannu woradda gashshaano, gobbate geerrinna abbaagadootunna hajo la’annonsa bissa leeltino.
Sidaamu Qoqqowi Keerunna Ga’labbote Biiro Sooreessi Kalaa Alemaayyehu Ximootewoosihu Sidaamu Daga umise umose gashshate assitino sharrora rodoo Oromote Daga halammensa leellishshe sa’inota xawise; qoqqowu giddo wo’manti daga ayirrisante taalleenyunni heedhannota coyi’rino.
Sidaamu Qoqqowi 90% Oromote ledonna 10% Wodiidi dagoomii ledo dannunni xaadannota qummi asse; lamente rodoo daga keere baxxannokki bissa sa’e sa’e gaance kayissanni leeltanno.
Tenne mitiimma hegerera tirate gutu keerinna jireenyira mittimmatenni loosa agartannotano sokka saysino kalaa Alamaayyo.
Oromiyu Qoqqowi Keerunna Ga’labbote Biiro Layinki Sooreessi Kalaa Haayle Gurmeessihu isi widoonni, ka’ino gaance hashsha barra yinummokkinni loonse uurrinsoommo yee; wirro labbino gaance ka’annokki gede loonsanni yiino.
Galchimi Arsi Zoone Gashshaanchi Kalaa Ahimedi Haajihu, Sidaamunna Oromote Daga mittu anni ooso ikkansanni kiphantara dihasiissanno yaanni sokka saysino.
Gaance kayissannori mittimmankenni hagiidhitinokki wolqanniiti yiinohu gashshaanchu; ka’anno gaance budunninna geerrunni tira hasiissannota coyrino.
Hegeraame ga’labbo abbate woraddatenna olluubbate deerrinni dagate ledo hala’lado hasaawa assinoonnita xawise; sufe hegeraamu keeri daara hasiissanno yiino.
Lamente dannunni xaaddanno qooxeessuwara ka’ino gaance tirate harinsho aana illachishshino borro shiqqeenna hasaawa assinoonniha ikkanna; Seeru aliidimma buuxisiisate hixamanyine loonsannitano xawinsoonni.
Tenne battalara sumuu yinoonnita dagate giddo rumuxxisiisatenni hegeraame ga’labbo kalaqantanno gede loosa wo’mante hajo la’annonsa bissawinni agarantannotano kayinsoonni.
Gaazeexu Odeessaanchinni
Bakkalcho Onkoleessa 25, 2014 M.D
