Addis Ababa:- Cancishaanchu HWHT gaamo iillishshino gawajjonni rosukkinni xaano wirro olaho qixxaawansa gaamo so’ronsanni higgannnokki kakkachulle ikkansa leellishannoho yii; Sidaamu qoqqowi pirezidaantichi kalaa Desta Ledamohu.
Pirezidaantichu Itophiyu Pireesete Uurrinsha ledo assino keeshshonni xawisino garinni; cancishaanchu HWHT gaamo konni albaannino fantino olinni Tigirayete daga ooso reyote, goofotenna shettote tuggino.
Kakkacha gaamo lame doyichonni fantino olinni Tigirayete daga oosonsa hooggino; daga afi’ra hasiisannonsata mootimmate owaanteno hoogge jawa shetto giddo ubbino yiino.
Tigirayete daga baca shetto giddo ubbanno gede HWHT massagaano so’rote doogonni massagansanni ikkinota huwachishinohu kalaa Desta; daga duucha yannara shetissanni keeshshite xaano wirro olaho qixxaawansa so’rote assoote ikkasi daga seekkite huwatte tenne kakkacha gaamoha hunote assoote sharrantara hasiisanno yiino.
HWHT massagaano taalleenyunninna keerunni qoqqowu daga massage dagate xa’mora dawaro qolte affannokkita huwattinohura dagate illachanna hedo soorrate Aliyye hajajo aana hedeweelcho ola fante barshe loosatenni gobba hasiisannokki oli giddora e’anno gede assitino. Hunote gaamo sharrammeemmonsa yitannore Tigirayete dagano jawu qarri giddo tuggino yiino; pirezidaantichu.
Tigirayete daga noo ikkitono mootimma huwatatenni gatu loosinna woloottano latishshu loossa widira higganno gede hedatenni seera agarsiissannori olantonna woloottuno ga’labbote bissa Tigirayete qoqqowo agurte fultinota qaagiissinohu pirezidaantichu; dagate uynoonnita dancha kaayyo dagote gede horoonsidhe hasaambe tira dandiinanni hajo ikkite heedheennanni wirro ola fanatenni Amaarunna Affaarete qoqqowubba horratenni mannihimmatenna jajju aana luphiima gawajjo iillishshino yiino.
Tigirayete dagano oosonsa danotenni kakkalantanno gede assatenni hattono duuchanti latishshu loossanna hasiissannonsa owaante uurritanno gede assatenni hunaano gaamo fantino olinni gobbano jawu qarri giddo keshshitino.
Kalaa Desta yiino garinni, xa Tigirayete dagara hasiisannohu keerehonna latishshu kaayyubba horoonsi’rate. Keeru teesanno gede assate Itophiyu mootimmanna daga qixxaabbinore ikkitinota kulinohu pirezidaantichu; xaano wirro olaho qixxaabbanni noori HWHT hunote gaamo hunote assoote kalqoomu dagoomi ikkino’ne yaara hasiisannotano huwachishino.
Gobbankera daggino soorro duuchanka badooshshu nookkiha taalo ikkino garinni la’annota ikkase coyi’re; Tigirayete daga kayinni wolootta gobbanke daganna dagoominte gede taalo beeqqaanonna horaameeyye ikkitannokki gede kakkachuullu HWHT gaamo jawa jifo ikkitanninsa noota qummeessino.
Dagano duucha yannara hunote gaamo fantanno olinni shettote giddo hee’rantenni umonsa wolassate sharramanna woloottu roduuwu daganni ledo albinte gede keerunninna mittimmatenni hee’rate qoossonsa agarsiisi’ra noonsatano amadisiise huwachishino.
Amsaalu Felleqe
Bakkalcho Onkoleessa 25, 2014 M.D
