Addis Ababa:- Techo layinki xibbuu murrooti maassamaano mokkonninooti; ga`a jeneraalooti gobba agarsiisate bayiriidi seeriwiinninna gobbate baxillinni xorshamino illachi hee`ransara hasiisanno yee IFDR xaphoomu ministirchi Dr Abiy Ahimedihu egensiisi.
Maassote amanyooti aana leellinohu IFDR xaphoomu ministirchi Dr Abiy Ahmedihu coyi`rino garinni; baalanti maassamaano mokkonnine gobbate danna agarate bayiriidi seeriwiinninna gobbate baxillinni xorshantino hedo hasiissannonsa. Gobbasi baasa baxannonna hendesinni badhe higannokki sufattotenni lopha hedanno mokkonnine ikkitinanni gede agarranni yino.
Kaimaho ikkitannonsa egenno olaantote akkaadaamenni afidhinori maassamaano mokkonninooti aantanno yannara bobbakkanno qasiiso baalantera aliidi sooreeyyenna olantotewiinni baca qajeelsha afidhannoha ikkasinni, barru baala nabbawa, rosa, qooxeessa xiinxa`lanna buuxi`ra baasa baxxannore ikka noonsa yee xawisino.
Bareedu egenno nookkiha wo`ma dikkanno yinohu xaphoomu ministirchi;bareende, illachanna egenno babbaddinikkinni mitteenni waaxatenni barru baala lossatenni Itophiyu naaxxille ikkitinanni mokkonninoota ikka agarranni`ne. Itophiyu daga qeelaanotenka; qeelaano ikkine sunfeemmo; Itophiyimma qeela didandiinoonni; albillichono didandiinanni. Kuni buuxamannohu qeellete tii“a uddidhino olaantote uurrinshinna mokkonninootu heedhunkeha ikkiro ikkasinni maassamaano gobbate mittimmara loosa noo`ne yee huwachishino.
Maassantinoonni akkaadaame baca bareedda fushshitinote yinohu xaphoomu ministirchi; Itophiyunnita bareedda ooso ikkate mudhitinoonni techo barrinni layinki xibbuu murricha yinanni`neri kayinni giddo`ne baca jeneraalooti, gobbate massagaano, gobbate naaxxillubba kalaqantanno dhaggete barraati yino. Aantanno heeshsho`ne dirrara baala hawamannokki barra ikkinohura techora layinki xibbuu murrooti ga`a jeneraalooti hawalle hagiidhitinoonni yino.
Itophiyu gargarooshshu olanto itaamaazhoor shuum fiild maarshaal Birhaanu Julla isi widoonni; soorrote gedensaanni olaantonke olu istiraateeje ragi garinni Itophiyu olaantote akkaadaame umi yannara luphiima kiiro noonsa dooramaano mokkonninoota adhite islaanchimmatenni qajeelshatenni sa`u dirrara kalanqaminoha dooramaano mokkonninooti qajeelshi foonqe wonshinoho yino.
Tayxe maassamaano baxxitinore assannonsari; haammatu babbaxxino rosu golinni uminna layinki digire noonsare ikkansanniiti yinohu fiild maarshaalichu; maassamaano gobbanke qarru giddora e`e noo yannara luphiimanniha roso`ne aguratenninna looso`ne uurrisatenni gobba`ne olaantote ogimmanni owaatate umi`ne fajjonni mudhitine qajeelsha jeefisa`nenni ki`ne gobbate hexxooti yino. Aanteteno mitto hanafaanchu mokkonninchi gede uynanni`ne looso ikkadimmatenni fultinannita ammaneemmo yee coyi`rino.
Maasso leellishshannohu olaantonke techono beroohu gede bareeddate burqichonna kaajjadu xinti aana ijaarantanni nootaati yinohu fiild maarshaalichu Birhaanu Jullahu; maassote gedensaanni bobbakkinanni kifilera karsantinanniti olantonke culku gede giiratenni jifantinore, uminsanni roorsite daganna gobba balaxisiissino; hiittenneno polotiku paartera ha`litannokkireti. Ikkinohurano qaajeelshu yannara cu`midhinoonni egenno loosu widira soorrate rahotenni olantote ledo waaxamatenni gumaamo massagaancho ikkate qixxaabbe yeeno qummeessino.
Abbebech Maatewoos
Bakkalcho Onkoleessa 25, 2014 M.D
