– Hawaasi quchumi teesaano
Geexaanote maamarra widoonni dagooma irkisate daanno laalcho garunni afidhanni nookkita mite mite Hawaasi quchumi teesaano Itophiyu Pireesete Uurrinshara koffeenyansa xawissino. Teessaano kultanno garinni; baxxinohunni Zayte dagguro maamarra hoteellatenna wolootu daddalu uurrinshuwara sayissannota.
Ledoteno mittu geexaanote maamarira sagalete laalchi daannohu borreessamino manni kiironni ikke hee’reenna laalchu eihunni layinki barra adhinummokkinni hiitto gooffino yinanninke?; tini jawa so’rooti yitanni teesaano huluullonsa xawissanno.
Hattono Sagalete Zayte Sasu aganinni mitte higge daggannota kayissannori quchumu teesaano; mittu manchira mittenna sa’’e sa’’e lame liitre aleenni iillitannokkitanna togoo assooti dagoomunniha heeshshote qarra tirara dandaannokkita coyidhino;. Sukkare kayinni tayixe dirinni horontanni dagge egentinokkita ledde kultino.
Konni daafira mootimma dagoomunniha heeshshote muxximma qarra tirtaranna daga irkisara dandaannore kalaqqankera hasi’neemmo yitanni koffeenyansa xawissinori quchumu teesaano xa’midhino.
Ninkeno teesaanote koffeenyira dawaro qoltankera Hawaasi quchumi daddalunna dikkote latishshi biddishshi sooreette dukko Belayinesh Geda bilbilunni hasaawinsoommoha ikkanna; iseno teesaano kayissanno koffeenyi gara ikkasi kulte; geexaanote maamarra widoonni daannohu sagalete laalchi albi gede mule mulenni e’’anni nookkitanna mannu kiiro bikkinni daannohuno ikkado ikkinokkita xawissino.
Xaphoomunni hasattonna shiqisho horontaanni taaltinokkita duudhe kayissanno.
Konni gobbaanni assinoonni harunsonni e’’ino laalcho dagate garunni iillishantenni maaxxannorinna hirtanno geexaanote maamarra heeransa maanxannikkita ikkase xawissinoti dukko Belayineshi; konne assoote gatisateno addi addi looso loonsanni hee’noonnitanna lamu sinu quchumira togoo assooti aana afantino maamarra aanano qaafo adhinoonnita coyidhino.
Aantino yannara baxxinohunni Sagalete zaayte iillo woyyeessate aanino aganira alba uynanniwiinni ero assine uynannitanna, konni giddonnino 50 anga xibbuunni mootimmate loosaasineranna 50 anga kayinni wolootu dagoomu bissara iillishate loonsanni hee’noonnita egensiissino.
Dukko Belayineshi ledotenni; laalchu anje qarri quchumu woyi qoqqowu gashshootinni calla tidhamanno qarra ikkinokkita kayisse’; federaalete mootimma ledo halante dagate hasattonna shiqishote aana noo qarri tidhamanno hayyo kalaqquro danchaho yitanni hedose wortino.
Qiddist Gezaheny
Bakkalcho Onkoleessa 18, 2014 M.D
