Sidaamu dagoomu qoqqowi tenne lamala giddo oofaanote aana leeltanno foonqe buuxate hedeweelcho qorqqorsha assitino.
Sidaamu qoqqowira Hedeweelcho Tiraafiikete qorqorsha assinoonnihu Hodhishshu Lojistike ministere,doogote keeraanchimmanna Mediinete fande owaante hattono Federaalete Polise komishiine Tiraafiikete qorqorshi biddishshi qineessonni ikkinota Sidaamu qoqqowi Tiraafiikete dano gargarooshshi darikitoreete daarikitere qaru inspekiterichi Shonnori Saakumihu Itophiyu Pireesete uurrinshara xawisino.
Qaru Inspekiterichi xawishshisinni,sa’u lame barrubba giddo assinoonni hedeweelcho Tiraafiikete qorqorshinni 540 addi addi kaameella oofaano Tiraafiikete wodho agartinokkire bande woxunna taashshate qoricha adhinoonnita xawisino. Togoo qorqorshi tiraafiikete dano ajishate jawa horo afi’rino daafira, dano gargaratenna seeru aliidimma agarantanno gede tantanamino qorqorsha harunsine gumullanni yiino.
Sa’u lamala giddo qoqqowoho assinoonni 9 agani keenonni tiraafiikete dano nirinni heewisiinsiro luphiima ikkite leeltinota xawisinohu Inspekiter Shonnori; tiraafiikete polise miillara qajeelsha uyneenna mannu aanna jajju aana iillitanno tiraafiikete dano ajishate addi garinni mixi’ne loosoho e’noonnita xawisino.
Hawaasinni Dilla,Hawaasinni Morocho -bilaatte massitanno doogo haaruu garinni loonsi kawa doogo injiitinoha ikkirono,dano lexxate mitto kora ikkitinohura; oofaano ranke ajishshanno gede assanno doogote malaate doorantino baseranna danote bidhatto ikkinowa loosate qoqqowu dooggate latishshi biiroo ledo hasaambanni hee’noonnitanna muli barra taashshinannita egensiisino Inspekiterichu.
Wole widoonni,rosu minna,amma’note minnanna maate dano iillitannokki gede fultanno qeechi luphiima ikkinota qummeessinohu sooreessu;amma’note uurrinshanna rosu minna tiraafiikete polisee ledo ikkatenni daga guracho midaado amadde hodhitanno gede rosiisa agarannonsatano qummeessino.
Amadisiiseno Inspekiter Shonnori,lamu gommi dhoqqidhaqqe qoqqowoho danote bati’rara kora ikkitino daafira, dhoqidhoqqe ooffannori rankensa agadhanna badheenni mitto mancho calla hogowatenni dano ajjanno gede uminsa qeecha fultanno gede sokkasi saysino.
Bakkalcho Onkoleessa 18, 2014 M.D
