-IItophiyu Pireesete uurrinsha Dire-Daawaho qixxeessitino “Itophiyu daafira” yitanno battalara miinja illachishino hasaawa jajjabba sooreeyye koyinsenna hasaamboonni.
Addisi Ababa:- Itophiyu laashsho yitanno millimillo laashshaano handaarra millimillo aana kakkaooshshe kalaqqinota Industirete Ministeere egensiisino. Industire JDPetenni 6.8% xibbuunni noose qeecha 17.2 % lossate mixi`noonni.
Laashshitanno handaarra JDPete nooha 6.8 xibbunni 17. 2 widira lossate loonsanni hee`nonnita Ministeere egensiisino.
IItophiyu Pireesete uurrinsha Dire- Daawaho qixxeessitino Itophiyu daafira yitanno battalara Industirete Ministeere Ministerchi Kalaa Melaaku Aallebelihu coyi`ranni, “Itophiyu laashsho” yitanno millimillo hegersitinotanna handaaru lexxe kakka”anno gede assate mixi`noonni yiino.
Itophiyu laashsho yitanno millimillo laashshitanno handaarra calla ikkikinni labbanno handaarra dhukano lossate widoonni qeechisi luphiima ikkinota Kalaa Melaaku Aallebelihu qummeessino.
Konni handaarinni, cufantino faafirikuwa wirro looso hanffanno gede assatenni, laalcho ajishshino kubbaaniyubba laalcho lossitanno gedenna haaruuddu investimente daggano doogo kaa`late hattono loosu kaayyo kalaqate horo afidhinota egensiisino.
Itophiyu laashsho yitanno millimillo 2014 bocu baajeettete Diri gedensaanni hananfoonnita qaagiisinohu Ministerchu, Maaleezhiyunni, Singaapooretenni, Veetinaametenninna, Jaappaanete wiinni gade adhinoonni. Wole widoonni laashshitanno handaarra kakkaayisate addi addi qaafo adhine wole gummaame ikkitinokki gobbuwa gadeno la”ate wo`naalloonnita huwachishino.
Tonnu diri latishshu timo kaima assine laashshaanote handaarra xa noowinni 6.8 xibuunni JDPte qeecha 17.2 widira xibbuunni lossate assinanniti millimillo luphiima qeecha afidhinota qummeesino.
Hegersitino doogonni, laashshaanote handaarra dhuka kaajjisha hasiissanno. Ikknohura, xa noowinni 50 xibbunni Industirete laalchimma 85% xibbunni lossate tatanamino loosi loosamanni noota xawisino.
Tenne bare aana leellinohu Woxu ministrchi kalaa Ahimed Shidehu isi widoonni; mootimma gobbayidi soorro shiqishora balaxotenni afi’ra hasiissannonsa handaarra badde loossitanni afantannota xawise; dureeyye kayissannota gobbaydi soorro shiqisho anje sufotenni tirate balaxxe laalchimmansa lossi’ra hasiissannonsata xawisino.
Gobbate lophote kora ikkinohu laashshaano industirra handaari gobboomu miinjinni qara illacha uynoonnisita xawisinohu kalaa Ahimedi; mootimmate widoonni safote latishsha halashsha, gobbaydi soorro shiqisho lossanna owaante aate harinsho injiitinotanna shota assate kaa’litanno loossa kaajjite sufansa qummi assino.
Handaara lossate kayinni mootimmatenni gobbaanni qarunni hallanyu handaari beeqqo qara ikkase kaysinohu kalaa Ahimedi; gobba giddonna gobbayidi dureeyye laalchimmansa lossatenni miinju aana assitanno kaa’lo bowirsa dandiitanno yino.
Midrok Itophiyu gaamo massagaanchi kalaa Jemaal Ahimedihu; hallanyu handaari aana noota laashshaano industirra mitiimmanna amadantino hajubba aana shiqishino borronni xawisanni; mootimma gobba giddo dureeyyera assitanno irko lossa hasiissannose. Baxxinohunni gobbaydi soorro shiqisho laashshaano idustirrara garunni shiqishatenni handaara lossa hasiissanno yino.
Gobba giddo laashshaano gobbaydi gobbuwa dikkonni afidhanno daddalu loosinni afidhannota gobbayidi soorro ledote investimentera hosiisate hasatto noonsa. Konnira gobbaydi dureeyyera uynanni geeshshi illacha gobba giddo dureeyyerano aatenni laashshaano irkisa hasiissanno yino kalaa Jemaali.
Laashshaano industirra aana xaaddannota haammata mitiimma kaysatenni; mootimmano Hallanyu handaarra ledo noose halama kaajjishshanni hadhuro laashshaanote aana xaadanno qarra gatisatenni laalchimma lossa hasiissannota huwachishinno.
Itophiyu Pireesete uurrinsha gobbate hajo aana footote daa’’attonna addi addi hasaawu illacha quxatenni 11 quchummara leellishatenna hasaaisate mixo amaddinoha ikkanna;xaa geeshsha Jigijigahonna Dirreedaawaho gummaamo hasaawa assitino. Dagganno lamalarano footote daa’’attonna hasaawu Hararete qoqqowira sufe ha’rannoha ikkanna, duuchunku qoqqowira addi addi hasaawu umma sinqisidhe footote daa’’attonna hasaawa assate qixxaabbinota Ikkase Itophiyu Pireesete Uurrinsha Loosu harisaanchi Kalaa geetinneti taaddesehu buuxisino.
Abrahaam Saamuelhunna Qiddist Gezzahaanyi
Bakkalcho Onkoleessa 18, 2014 M.D
